КаратэмкIэ Дунаим ичемпионатрэ ипервенствэрэ къалэу Орел щыкIуагъэх. Ащ икIэщакIох Урысыем спортымкIэ и Министерствэрэ каратэмкIэ дунэе Федерациемрэ (IASKF). Iофтхьабзэм къэралыгъо 29-мэ ыкIи УФ-м ишъолъыр 83-мэ ялIыкIохэр хэлэжьагъэх.

Дунаим ипервенствэ зыщызыушэтыгъэ спортсменхэм ахэтыгъэх Адыгэ Республикэм икIыгъэ­хэри. Тренерхэу Владимир Васильченкэм, Никита Попругиным ыкIи Вячеслав Леус агъэсэрэ кIалэхэм гъэхъэгъэшIухэр ашIыгъэх, Урысыем ихэшыпыкIыгъэ командэ хагъэунэфыкIырэ чIыпIитIу къыфахьыгъ.
Илъэс 14 – 15 зыныбжьыхэм якуп хэтыгъэ Пако Астемир зэIукIэгъуи 5 иIагъ, зэкIэри къы­хьыгъэх ыкIи дышъэ медаль къы­фагъэшъошагъ. Тиспортсмен ящэнэрэу дунэе зэнэкъокъухэм апэрэ чIыпIэр къащыдехы. Мыщ фэдэ къэгъэлъэгъонхэр зиIэр зырыз. БлэкIыгъэ илъэсым ­Адыгеим испортсмен анахь дэгъуипшIым Астемир ащыщ хъугъэ. Адыгэ республикэ гимназием ар щеджэ.
Илъэс 16 – 17 зыныбжьыхэм якуп зыщызыушэтыгъэ Егор Христофоровым джэрз медаль къыфагъэшъошагъ. Ар Мыекъуапэ игурыт еджапIэу N 7-м икIэлэе­джакIу. Зэнэкъокъу зэфэшъхьафхэм пчъагъэрэ хагъэунэфыкIырэ чIыпIэхэр къащыдихыгъ.

ШэкIогъум и 29-м щегъэжьагъэу тыгъэгъазэм и 1-м нэс Мыекъуапэ щыкIощт Урысые зэнэкъокъухэм ахэлэжьэнхэу тиспортсменхэм загъэхьазыры. Адыгеим икъэлэ шъхьаIэ къеблэгъэщтых къэралыгъом ишъолъыр 23-мэ ялIыкIохэр. Адыгэ къэралыгъо университетым физическэ культурэмкIэ ыкIи дзюдомкIэ и Институт Iофтхьабзэр щырагъэ­кIокIыщт. Адыгеим и Правительствэрэ АР-м физическэ культурэмрэ спортымрэкIэ и Комитет яIэпыIэгъукIэ ар зэхащэ.