Хэгъэгу зэошхом хэлэжьагъэу, Красногвардейскэ район сымэджэщым иврач шъхьаIэу щытыгъэ Борис Авакимян ишIэжь фэгъэхьыгъэу волейболымкIэ турнир мы мафэхэм зэхащагъ.

ПсэупIэу Красногвардейскэм къыщызэрэугъоигъэх Адыгеим ыкIи Краснодар краим яхъулъфыгъэ командэхэр. ЕшIэгъухэр гъэшIэгъонэу, узIэпащэу рекIокIыгъэх.
Финалым щызэIукIагъэх Мые­къуапэ икомандэхэу «Авангардымрэ» «Нартымрэ». Апэрэр нахь лъэшыгъ, текIоныгъэр къыдихыгъ. Адыгэ къэралыгъо университетым илIыкIохэм ящэнэрэ чIыпIэр афагъэшъошагъ.
Турнирым иешIэкIо анахь дэгъухэр зэхэщакIохэм къыхагъэ­щыгъэх. Ахэр: Сергей Ивановыр («Авангард»), Сергей Костюкрэ Николай Гудковымрэ («Нарт»), Илья Торонец («АГУ»), Илья Пономаревыр (спорт еджапIэу С.М. Джэнчатэм ыцIэ зыхьырэр).