Дунэе кIэлэцIыкIу экологическэ форумэу «КIэлэцIы­кIухэм анэхэмкIэ чIыопсыр зэрэзэхъокIырэр» зыфиIо­рэм Джыракъые щыщ эколог ныбжьыкIэхэм текIоныгъэ къыщыдахыгъ.

Пластикым хэшIыкIыгъэ пыдзафэхэу псыхъоу Фар­зэ хэлъхэр хэхыгъэнхэм фэгъэхьыгъэ видеоролик ахэм агъэхьазырыгъ.
Форумым хэгъэгум ичIыпIэ зэфэшъхьафхэм ащыпсэурэ ныбжьыкIэхэр зэрипхыгъэх ыкIи эко­логическэ гумэкIыгъохэр щыгъэзыегъэнхэм, зэхъо­кIыныгъэ афэхъуным апае шIэгъэн фаехэм атегущыIагъэх. Мы илъэсым форумым хэлэжьагъэхэм япчъагъэ фэдитIукIэ на­хьыбэ хъугъэ. ЗэкIэмкIи Урысыем ишъолъыр 74-мэ ащыщ ныбжьыкIэ мин 56-мэ яIофшIэнхэр ащ агъэ­хьыгъэх. Джащ фэдэу Туркменистан, Тыркуем, Китай, Казахстан, Бол­гарием, Румынием ыкIи Беларусь яныбжьыкIэхэр хэлэжьагъэх. Зэфэхьысыжьхэм къызэрагъэлъэгъуагъэмкIэ, форумым нэбгырэ 5600-рэ къыщыхагъэщыгъ.
Адыгеим икуп «ЭкоБлогер» зыфиIорэ лъэныкъом апэрэ чIыпIэр къыщыди­хыгъ. Видеороликым Iоф дашIагъ Джыракъые дэт гурыт еджапIэу N 3-м икIэлэеджакIохэу Мырзэ Гупсанэ, Нэгъэрэкъо Загирэ, ЖакIэмыкъо Гупсанэ. Ахэм IэпыIэгъу афэхъугъ классым ипащэу ЖакIэмыкъо Анжелэ.
ШэкIогъум и 18-м текIоныгъэ къыдэзыхыгъэхэр Москва щагъэшIуагъэх. Iофтхьабзэм нэбгырэ 400 хэлэжьагъ. Анахь къахэщыгъэхэр зэрагъэшIуагъэ­хэм имызакъоу, Фондым ипартнерхэм мастер-классхэр афызэхащагъэх. Жа­кIэмыкъо Анжелэ къызэри­IуагъэмкIэ, непэрэ ма­фэм экологием епхыгъэ гумэкIыгъохэр анахь шъхьа­Iэмэ ащыщых, ащ къы­хэкIыкIэ ныбжьыкIэхэр яцIыкIугъом къыщегъэ­жьагъэу тыкъэзыуцухьэрэ ду­наим фэсакъынхэу егъэ­сэгъэнхэ фае.
— Дунэе форумым пшъэ­шъэжъыехэр зэрэхэлэжьагъэхэм ишIуагъэкIэ экологиемкIэ шIэныгъэу яIэхэр къагъэлъэгъуагъэх, чIыопсым шIулъэгъоу фыряIэр къыщыраIотыкIыгъ, мы Iофыгъо шъхьаIэм изэшIохын яIахь халъхьан алъэкIыгъ, — къыIуагъ Анжелэ Адам ыпхъум.