ПхъэкIэ е нэмыкI гъэстыныпхъэ пытэкIэ зиунэ зыгъэ­плъыхэрэм зыщагъэгъупшэ хъущтэп хьакухэм фабэр къы­зэратырэм нэмыкIэу, машIом зыкъыштэнымкIи щы­нагъо къыздахьын зэралъэкIыщтыр.

Бжыхьэ-кIымэфэ лъэ­хъа­ным унэе унэхэм арыт хьакухэм бэрэ къакIанэу къыхэкIы. ТхьамыкIагъом лъапсэ фэхъурэр зэфэ­шъхьаф. Ахэм зыкIэ ащыщ унэхэр зэрагъэплъырэ хьакухэр ашIыхэ зыхъукIэ, машIом зыкъымыштэнымкIэ шапхъэхэр зэраукъо­хэрэр.
Хьакухэмрэ IугъоикIыпIэхэмрэ язытет ренэу ауплъэкIун фае. Онджэкъхэр зыгъачэхэрэм ащыщ IугъоищыпIэхэм арыхъорэ пкIэгъуасэр зэрэстырэр. Хьакухэм ягъэпсынкIэ шапхъэхэр къыдалъытэн, Iугъор зэрыкIырэ дэпкъхэмрэ онджэкъхэмрэ ­игъом гъэкъэбзэгъэнхэ фае. Хьаку Iупэм сантиметрэ 50 — 70-рэ зиинэгъэ тенэч бзыгъэ теIулIэгъэнэу щыт. ЯтIонэрэ хэукъоныгъэу ашIыхэрэм ащыщ бензин, фэтагын е къэорэ гъэстыныпхъэхэр хьакум зэрэпакIэхэрэр. Джащ фэдэу пхъэу ащ палъхьэрэм икIыхьагъи хьакум фытегъэпсыхьэ­гъэн фае. Хьакушъхьэр бгъэплъыщэнэу щытэп. МашIо зэрамышIыхьэу бэрэ щытыгъэ хьакур игъорыгъозэ бгъэплъын фае.
Ежь-ежьырэу зиунэ пхъэкIэ е нэмыкI гъэстыныпхъэ пытэкIэ зыгъэплъы­хэрэм ягугъу тшIы зыхъу­­кIэ къыхэтымыгъэщын тлъэ­кIырэп щынэгъошхо къэзытыхэрэм мэшIожь гъозыр зэращыщыр. Ма­шIом ыпкъ къикIэу зидунай зы­­хъожьыхэрэм азыны­къом нахьыбэр ары зытхьалэ­рэр. Ащ шъо иIэп, цIыфым къышIэрэп. Iугъои­щыпIэр зэфэзышIырэ гъу­чIыр
зырагъачъэкIэ, мэшIожь гъо­зыр унэм иты мэхъу.
ПхъэкIэ зиунэ ­зыгъэплъыхэрэм ашIэ мыхъущтхэр:
— машIо зэрышIы­хьэгъэ хьакум лъыплъэн щы­­мыIэу е зыныбжь имы­къугъэхэр Iусхэу къэбгъэ­нэныр;
— хьаку Iупэм машIор къызыкIэнэщт пкъыгъо­хэр Iуплъхьанхэр;
— щыгъынхэмрэ пхъэ­хэмрэ хьакушъхьэм щы­бгъэчъэпхъынхэр;
— машIом изэкIэгъэ­блэнкIэ къэорэ гъэсты­нып­хъэхэр бгъэфе­дэнхэр;
— хьакупчъэр Iухы­гъэу къэбгъэнэныр;
— шIомыкIым, газым афытемыгъэпсыхьэгъэ хьакур бгъэплъыныр;
— IугъоикIыпIэхэм ямы­щыкIэгъэ пкъыгъо­хэр арыбгъэуцонхэр;
— хьакур лъэшыщэу бгъэплъыныр.
ЗекIокIэ мытэрэзыр ма­шIом къызэрэшъуфимыгъэгъущтыр зыщышъумыгъэгъупш. Урысые Федерацием ихэбзэгъэуцугъэ зэрэщыгъэунэфыгъэм тетэу машIом зыкъымы­штэнымкIэ шапхъэхэр къыдилъытэнхэр хэти ипшъэрылъ. Шъо шъушъхьи, къышъупэблагъэхэми ящыIэныгъэ къырыкIощтыр бэкIэ къызэрэшъолъытыгъэр зыщышъумыгъэгъупш.
МашIом зыкъыштагъэу зышъулъэгъукIэ, телефон номерхэу 01-м ыкIи 101-м е зыкI оперативнэ къулыкъум иномерэу 112-м шъутеу.
УФ-м ошIэ-дэмышIэ ­IофхэмкIэ и Министерствэ и ГъэIорышIэпIэ шъхьаIэу АР-м щыIэм икъэрэгъулэ ипащэу Хьагъундэкъо Мэдин.