Росреестрэм и ГъэIорышIапIэу АР-м щыIэм Тэхъутэмыкъое районымкIэ иотдел иIофышIэхэм гаражымрэ ар зытет чIыгу Iахьымрэ ягъэпсын фэгъэхьыгъэ упчIэу цIыфхэм нахьыбэу къатыхэрэм джэуапхэр къаратыжьых.

«Гаражхэм яамнистие» фэгъэхьыгъэ хэбзэгъэуцугъэр зыщыIэм къыщыублагъэу Адыгеим гараж зытет чIыгу Iахь 283-рэ пстэумкIи щатхыгъ. Ар квадратнэ метрэ 7754-рэ ыкIи «капитальнэкIэ» алъытэрэ псэолъэ 520-рэ мэхъу. Мы хэбзэгъэуцугъэр зыщыIэр илъэсищ хъугъэу, мымакIэуи цIыфхэм агъэфедэ нахь мышIэми, ащ епхыгъэ упчIэу къатырэр джыри бэ. Ахэм яджэуапхэр къет­тыжьхэ тшIоигъу.
Сыд фэдэ тхылъа ищыкIагъэхэр?
Гаражыр зием мыхэм ащыщ къытымэ икъущт:
гараж кооперативым взносхэр зэрэритыхэрэм фэгъэхьыгъэ тхылъыр;
чIыгу Iахьыр къызэрэратыгъэр, ащ игъунапкъэхэр, кадастрэ уасэр зэрытхэр;
гараж тыришIыхьанэу чIыгу Iахь къызэрэратыгъэр къэзыушыхьатырэ тхылъэу нахьыпэкIэ Iоф зыщишIэщтыгъэ организацием е кооперативыр зичIыгу тетым къыщатхыгъэр;
электричествэм икIуа­пIэхэм е инженер хъытыухэм зэрапишIагъэм фэгъэхьыгъэр;
коммунальнэ фэIо-фашIэхэм, гущыIэм пае, электроэнергием, апкIэ зэритыгъэ квитанциехэм ащыщ;
гараж кооперативым зэрэхэтыр къэзыушыхьатырэ тхылъыр;
псэуалъэм итехническэ паспорт е нэмыкIэу пылъхэр.
ЦIыфыр гараж кооперативым къыхагъэкIыгъэмэ, «амнистиер» къынэсыщта?
Ары, гараж кооперативым къыхэкIыжьыгъэри мыщ къыхеубытэ. Федеральнэ хэбзэгъэуцугъэу N 173-м ия 3.7-рэ статья ипунктэу 7-м ар къыдыхэлъытагъ.
Гаражхэр къызэрыкIо шIыкIэм тетэу бгъэпсынхэмкIэ IэпыIэгъу хъурэ шапхъэхэр Росреестрэм къыгъэхьазырыгъэх. Ащ имызакъоу, мы лъэны­къомкIэ нахьыбэу цIыфхэм къатырэ упчIэхэм яджэуапхэри къыхеутых.