Кощхьэблэ районым ит гурыт еджэпIищмэ сомэ мин 350-рэ зырыз мы мафэхэм афагъэшъошагъ. КIэлэеджакIохэр зыщеджэхэрэм хэхъоныгъэхэр ашIынхэм фэгъэхьыгъэ проектхэм ягъэхьазырын фытегъэпсыхьэгъэ зэнэкъокъум текIоныгъэ къыщыдэзыхыгъэхэр агъэшIуагъэх.

Iофтхьабзэр тIоу гощыгъагъэ. Апэрэм зэнэкъокъум ухэлэжьэным пае ищыкIагъэхэр, лъэныкъоу анахь унаIэ зытебгъэтын фаехэр къафаIотагъэх. Тхьамафэм къыкIоцI гурыт еджэпIэ 13-мэ лъэныкъо зэфэшъхьафхэмкIэ проектхэр къагъэхьазырыгъэх.
Гурыт еджапIэхэм хэхъоныгъэхэр ашIынхэмкIэ гухэлъэу яIэхэр кIэлэе­джакIохэм къыраIотыкIынхэр, ахэр къа­гъэшъыпкъэжьын алъэкIэу гъэсэгъэнхэр, ныбжьыкIэхэр общественнэ щыIакIэм хэщэгъэнхэр, пшъэрылъ гъэнэфагъэхэр зыфагъэуцужьынхэм фэгъэсэгъэнхэр, ахэр къыраIотыкIыжьышъуныр ыкIи щыIэныгъэм щыпхыращыжьыныр анахь шъхьаIэу щытыгъэх.
АР-м финансхэмкIэ иминистрэ иапэрэ гуадзэу Екатерина Косиненкэр Iофтхьабзэм зэфэхьысыжьхэр къафишIызэ кIэ­лэеджакIохэм зэрифэшъуашэу зыкъызэрагъэхьазырыгъэр къыхигъэщыгъ. Проектхэр къаIотэгъэ закъоу щымытэу къэшъуагъэх, орэдхэр къаIуагъэх. Куп пэпчъ иеджапIэ игумэкIыгъо къыIэтыгъ. Iофыгъо зэфэшъхьафхэм япхыгъагъэх япроектхэр, анахьэу ныбжьыкIэхэм языгъэпсэфыгъо уахътэ зыщагъэкIощт, творчествэм зыщыхагъэхъон алъэкIыщт чIыпIэхэм ягъэпсын, еджапIэхэм ящагухэм язэтегъэпсыхьан.
Зэнэкъокъум ипилотнэ проект зыщагъэцэкIэгъэ Кощхьэблэ районым къикIыгъэ куп 13-мэ къагъэхьазырыгъэхэр къызагъэлъагъохэм ыуж, ежь ныбжьыкIэхэм нахь агу рихьыгъэхэм амакъэ афатыгъ.
Анахь дэгъоу зыкъэзыгъэлъэгъуагъэ­хэр ыкIи анахь мэкъабэ зыфатыгъэхэр гурыт еджапIэхэу NN 6-р, 8-р ыкIи 9-р ары.
Поселкэу Дружбэм дэт гурыт еджапIэу N 6-м ипроект зыфэгъэхьыгъагъэр еджа­пIэм ищагу изэтегъэпсыхьан. Непэрэ мафэм мыщ нэбгырэ 300-м кIахьэу щеджэ. Iофтхьэбзэ зэфэшъхьафхэр щагум щызэхащэнхэмкIэ къины къафэхъу­щтыгъ, сыда пIомэ ар цIыкIугъ. ЧIыпIэр зэрагъэпсын алъэкIыщтыр къагъэлъэ­гъуагъ ыкIи зэрифэшъуашэу ар къыраIотыкIыжьыгъ.
ПсэупIэу Вольнэм дэт гурыт еджапIэу N 9-м ипроект лIыхъужъхэм афэгъэхьыгъэ музеим икъызэIухын зытегъэпсыхьэгъагъэр. Ахъщэу къафагъэшъошагъэр агъэфедэзэ чIыпIэ хэхыгъэ ашIыщт. Хэгъэгу зэошхом хэлэжьэгъэ лIыхъужъхэм ямызакъоу хэушъхьафыкIыгъэ дзэ операцием хэлажьэхэрэми, хэкIодагъэ­хэми афэгъэхьыгъэхэр ащ чIэлъыщтых.
ПсэупIэу Натырбыем дэт гурыт ­еджапIэу N 8-м ипроект автогородок гъэ­псыгъэнэу, кIэлэцIыкIухэм гъогурыкIоным ишапхъэхэр интернет закъокIэ зэрамыгъашIэу нэрылъэгъу афэхъунэу ащ къы­делъытэ.
Мэхьанэшхо зиIэ зэнэкъокъур къэ­кIорэ илъэсми зэхащэн мурад зэряIэр кIэухым къыщаIуагъ, ащ муниципальнэ уцугъо къыхагъэхьанэу агъэнафэ.
ДЕЛЭКЪО Анет.