Адыгеим шэкIогъу мазэм пэтхъу-Iутхъур ыкIи нэмыкI зэпахырэ узхэр къызэузхэрэм япчъагъэ щыхахъоу фежьагъ. Ау эпидемиологием изытет щынэгъо чIыпIэм джыри пэчыжьэу къыщытаIуагъ щэфакIохэм яфитыныгъэхэр ыкIи цIыфым игупсэфыныгъэ къэухъумэгъэнхэмкIэ Федеральнэ къулыкъум и ГъэIорышIапIэу Адыгэ Республикэм щыIэм.

Эпидемиологие лъыплъэнымкIэ отделым ипащэу Гурген Авакян къызэриIуа­гъэмкIэ, зэпахырэ узхэм нахь зыкъызыщаIэтырэ лъэхъаныр тыгъэгъазэм ыкIэм щегъэжьагъэу мэзаем икъихьагъум нэс.
— Мы уахътэ пэтхъу-Iутхъум, гриппым ыкIи ковидым лъэшэу республикэм зыщаушъомбгъу пIоныр тэрэзэп, ау тызыхэт лъэ­хъаным елъытыгъэу, гущыIэм пае, Iоныгъом ебгъа­пшэмэ, сымаджэхэм япчъагъэ хэхъо, ар эпидемиологием ишапхъэу агъэнэфагъэм игъунапкъэ шъхьадэкIырэп. Сымэджэны­гъэм изытет ыпэрэ илъэсхэм атекIырэп. Пчъагъэхэм къагъэлъэгъорэ зэфэхьысыжьым тыхаплъэмэ, икIыгъэ тхьамафэм пэтхъу-Iутхъур республикэм щыпсэурэ нэбгырэ 700-м ехъумэ яIэу агъэунэфыгъ, ахэм ащыщэу 300-р кIэлэцIыкIух. Къалэу Мые­къуапэ пэтхъу-Iутхъур къя­утэкIыгъэу нэбгырэ 200 щат­хыгъ. ИкIыгъэ тхьамафэм гриппыр къяузыгъэу къыхагъэщы­гъэп, ау коронавирусым епхыгъэ хъугъэ-шIэгъи 7 агъэунэфыгъ. НахьыбэрэмкIэ штаммэу «омик­роныр» ары къахагъэщыгъэр, — хигъэунэфыкIыгъ Гурген Авакян.
Ныбжь купхэмкIэ уахаплъэмэ, зэпахырэ узхэр зэкIэми къяузых, ау нахьыбэрэмкIэ ыгъэгумэкIыхэрэр ныбжь зиIэхэу Iоф зышIэхэрэр ары. Пэтхъу-Iутхъум нахь ыгъэгумэкIыхэрэр кIэлэцIыкIухэу ублэпIэ ыкIи гурыт классхэм арысхэр (илъэси 7 – 14 зыныбжьхэр) ары.
Мы аужырэ уахътэм зэпахырэ узэу «коксаки» зыфиIорэр Урысем ишъолъыр­хэм защиушъомбгъоу федеральнэ къэбар жъугъэм иамалхэм бэрэ къаты. Ащ фэгъэхьыгъэу АдыгеимкIэ Iофхэм язытет тыкIэупчIагъ.
— «Коксаки» – псынкIэу зэпахырэ кIэтIэй уз лъэпкъхэм ащыщ. Мыр джы къежьэгъэ узыкIэу щытэп, сыдигъокIи щыI. Илъэсым къыкIоцI нэбгырэ зырызхэм къызэряутэкIырэм къыхэкIыкIэ ащ игугъу тшIэу хабзэп. НахьыбэрэмкIэ ар къызэузырэр купышхомэ ахэт кIэлэцIыкIухэр ары. Мы узри лъэхъан гъэнэфагъэм диштэу къежьэ, гъэмафэм ыкIэхэм – бжыхьэм икъихьа­гъум, зэкIэри зыгъэпсэфыгъо хым къызикIыжьыхэкIэ. Тишъо­лъыркIэ ащ епхыгъэу гумэкIыгъо щыIэп, — къыхигъэщыгъ эпидемиологым.
ЦIыфхэм пэтхъу-Iутхъу нэшанэхэр яIэ зыхъукIэ зэу медикхэм зафагъэзэнэу, ищыкIэгъэ профилактикэр ахьынэу, япсауныгъэ нахь фэсакъынхэу санитар врачыр къыфэджагъ. Нахьыбэрэ аIэхэр атхьакIынхэм мэхьанэ зэриIэр ащ къыхигъэщыгъ.
Iэшъынэ Сусан.
Сурэтыр авторым ий.