Къэралыгъо программэу «IэкIыбым щыпсэурэ тилъэпкъэгъухэм ежь яшIоигъоныгъэкIэ республикэм къищэжьыгъэнхэмкIэ IэпыIэгъу ягъэкIыгъэныр» зыфиIорэм зэхъокIыныгъэхэр фашIыгъэх.

Джы апшъэрэ ыкIи гурыт гъэсэныгъэ республикэм щызэзыгъэгъотырэ студентхэр ащ хэлэжьэнхэ алъэкIыщт. Мыщ фэдэ фитыныгъэ зэратыщтхэр илъэситIу еджэгъур къызэзынэкIыгъэу я 3-рэ курсым нэсыгъэхэр ары. Мы упчIэм фэгъэ­хьыгъагъ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ригъэ­кIокIыгъэ Iэнэ хъураер.
— ТичIыпIэгъухэр еджэн визэкIэ къакIощтыгъэх ыкIи сэнэхьат зызэрагъэгъотыкIэ пIэлъэ гъэнэфагъэкIэ республикэм щыпсэушъунхэу изын аратыщтыгъ. Ау непэ тэлъэгъу ахэм ащыщэу къа­нэ зышIоигъор зэрэмымакIэр. Ащ тыкъыпкъырыкIи, УФ-м хэгъэгу кIоцI IофхэмкIэ и Минис­терствэ лъэIу тхылъ фэдгъэ­хьыгъ, хэкужъым къинэ зышIоигъохэ студентхэм ащ фэдэ амал аратынэу, къэралыгъо программэм хэлэжьэнхэ алъэкIынэу ыкIи ар къытфадагъ. ИлъэситIо ­еджагъэм урысыбзэр Iулъ, ушэтыныр ытышъущт. Анахь шъхьа­Iэр, ныбжьыкIэу Адыгеим къинэ зышIоигъохэм адакIоу ахэм яунагъо арысхэми паспортхэр къаратыщтых, — тыщигъэгъо­загъ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр.
Iэнэ хъураем хэлэжьагъэх Адыгэ къэралыгъо ыкIи Мыекъопэ къэралыгъо технологическэ университетхэм ялIыкIохэр, хэхэс адыгэхэм ащыщ ­еджакIохэр. IэкIыбым къикIыгъэ адыгэ 41-мэ апшъэ­рэ ыкIи гурыт гъэсэныгъэр тишъолъыр щызэрагъэгъоты. ЗэхъокIыныгъэхэм афэгъэхьыгъэ упчIэу ахэм яIэхэр фагъэзагъэх Iэнэ хъураем иIоф­шIэн къырагъэблэгъагъэу, кощын IофхэмкIэ респуб­ликэ къулыкъум иIофышIэу ХьапэкIэ Рузанэ. Нэбгырэ заулэ къэралыгъо программэм хэлажьэхэмэ ашIои­гъоу аIуагъ. Пстэуми апэу ащ кIэ­лъэIугъэхэм ащыщ Ибрахьим Зина. Пшъашъэр
Сирием щыщ, Мыекъопэ къэралыгъо технологическэ университетым ия 3-рэ курс щеджэ.
— Программэм сыхэлэжьэнэу сыкIэлъэIугъ, ищыкIэгъэ фэIо-фашIэхэр згъэцакIэхэмэ урысые паспорт къысатынэу сежэ. Сиунагъо илъэсищ хъугъэу ­Адыгеим щэпсэу. Сянэжъ, сян, сшы, сятэшым иунагъу аIоу тызэгъус. Ахэри Урысыем ицIыф хунхэу фаех, — еIо ащ.
КъэIогъэн фае, къэралыгъо программэу «IэкIыбым щыпсэурэ тилъэпкъэгъу­хэм ежь яшIоигъоныгъэкIэ республикэм къищэжьыгъэнхэмкIэ IэпыIэгъу ягъэкIыгъэныр» зыфиIорэр 2019-рэ илъэсым къыщыублагъэу республикэм щыпхыращы. А уахътэм къыкIоцI нэбгырэ 286-рэ тишъолъыр къэкощыжьыгъ. Ахэр нахьыбэмкIэ зыщыщхэр Узбекистан, Казахстан, Таджикистан, Сириер, Иорданиер, Германиер, Эстониер. Ахэм ащыщыбэр республикэр зыфэныкъо специалистых.
Анцокъо Ирин.