ШэкIогъум и 22-м щегъэжьагъэу 25-м нэс Санкт-Петербург щыкIогъэ Дунэе фестиваль-зэнэкъокъоу «Кубок Гран-при» зыфиIорэм Тэхъутэмыкъое районым илъэпкъ орэдыIо ансамблэу «Къамылыр» хэлэжьагъ.

Сэнаущыгъэ зыхэлъ артистхэр къыхэгъэщыгъэнхэм ыкIи ахэм адеIэгъэным, творчествэмкIэ амалэу яIэхэр пхырыщыгъэнхэм, цIыф лъэпкъ зэфэшъхьафхэм культурэмкIэ язэдэлэжьэныгъэ зегъэ­ушъомбгъугъэным Iофтхьабзэр фэIорышIэ.
Фестивалыр зэрэкIуагъэм фэгъэхьыгъэу къытфиIотагъ Тэхъутэмыкъое районым иадминистрацие культурэмкIэ игъэIорышIапIэ ипащэу Хьатит Нурдин.
— Лъэпкъ студиеу «Къамылыр» зыхэ­лэжьэгъэ эстрадэ орэдымкIэ зэнэкъо­къур гъэшIэгъоныгъ. Лъэшэу тырэгушхо ансамблэу «Къамылым» тиреспубликэ чIыпIэ зэфэшъхьафхэм зэрифэшъуашэу къызэращигъэлъагъорэм. Культурэм хэхъоныгъэ ышIынымкIэ мыщ фэдэ фестивальхэм язэхэщэн мэхьанэшхо иI. Хэти исэнаущыгъэ къыгъэлъэгъон амал зэриIэм дакIоу нэмыкIэу узлъымыIэсыгъэми гу алъыптэн олъэкIы, — къы­Iуагъ Хьатит Нурдин.
Фестивалым ишIухьафтынэу сомэ мин 500 хъурэр зэкIэ купэу хэлэжьагъэхэм атырагощагъ.
Лъэпкъ студиеу «Къамылымрэ» Белгород къикIыгъэ купэу «Калина красная» зыфиIорэмрэ Гран-прир зэдагощыгъ. КупитIуми сомэ мин 20 зырыз зэрылъ сертификатхэр къаратыгъэх.
Лъэпшъыкъо Марьянэрэ Хьагъур Нуриетрэ къызэдаIогъэ орэдым пае апэрэ шъуашэ зиIэ диплом къафагъэшъошагъ. Ащ нэмыкIэу ансамблым иорэдыIоу Сергей Шперовыр фестивалым илауреат хъугъэ.
Зэнэкъокъум икIэух зэхащэгъэ гала-концертым «Къамылыр» хэлэжьагъ. Къэгъэлъэгъоныр къекIолIэгъэ пстэуми агу рихьыгъ. Фестивалыр тиартистхэм шIукIэ агу къинэжьыщт.
Сурэтыр: ансамблэм ихъарзынэщ.