Сабыибэ зэрыс унагъоу республикэм щыпсэухэрэм япчъагъэ илъэс къэс нахьыбэ мэхъу. МэфэкIым ипэгъокIэу Адыгэкъалэ щыщ Гъужъые­къохэм адэжь тыщыIагъ.

Насыпрэ нэхъоирэ зэрылъ унэгъо зэгурыIожьыр къэлэдэсхэм ящы­сэтехыпI, дахэкIэ къа­хэщых.
Альбинэ Гъужъыекъо лIа­къом къызыхахьэм илъэс 19 ныIэп ыныбжьыгъэр. Ащ къыщегъэжьагъэу бзылъфыгъэм идахэ нэмыкI аригъэIуагъэп, иунагъо зэригъэбэгъощтым, исабыйхэр дахэкIэ къызэрахигъэщыщтхэм ыуж ит. Ишъхьэгъусэу Руслъанрэ ежьыррэ сабыитф зэдапIу. Унагъом имэхьанэ зэхашIэу, гуфэбэ­ныгъэ зэфыряIэу зэдэпсэух, якIэлэцIыкIухэр къаIэтых.
— Укъызщыхъугъэ, узы­ща­пIугъэ унагъом укъекIышъ, нэмыкI лIакъо ухэхьэ. О узэсэгъэ шэн-хабзэхэм атекIын алъэкIыщт узэрыхьэгъэ уна­гъом илъхэр, арышъ, угукIэ укъэщтэ, укъэгумэкIы. Къызэ­рэппэгъо­кIыхэрэм мэхьанэшхо иI. Упшъэшъэжъые зыхъукIэ, бэмэ уягупшысэ, апэрэу плъэ­гъурэ бзылъфыгъэм «мам» зэрепIощтыр къызгурыIощтыгъэп. Ау апэрэ мафэм къы­щегъэжьа­гъэу ны шъыпкъэм фэдэу сеплъыгъ, ежьыри ны­сэкIэ къы­сэмыплъэу сыри­пшъашъэу си­лъытагъ, сэркIэ ащ осэшхо иI. Гуфэбэныгъэу унагъом къыспигъохыгъэр къызэрэз­гъэшъыпкъэжьыщтым, шъхьэ­кIафэ зэрафэсшIыщтым, зэрэзгъэлъэпIэщтхэм сыди­гъокIи сыпылъ, — еIо тигущыIэгъу.
Бзылъфыгъэ нэгушIу дахэм насыпышIоу зелъытэжьы. Къэ­гъагъ Iэрамым фэдэу ипшъэшъэжъыехэр кIэрысых, ина­хьыжъхэр, ипщ-игуащэхэр, ишъхьэгъусэ къыкъотых. Унагъом зэгурыIоныгъэ, рэхьатныгъэ зэрилъым егъэгушхо. ШъхьэкIафэ зэфашIыжьэу, яхъулъфыгъэхэм аIорэм ры­гъуазэхэу мэпсэух. Узэкъотмэ къыбдэмыхъун щымыIэу ащ елъытэ.
ШIулъэгъу зэрылъ унагъом сабыйхэр къихъухьанхэ зэрэфаер тигущыIэгъу къыхегъэщы. Сыд фэдэ гумэкIыгъо иIэми, кIэлэцIыкIухэм гуцаф аригъэшIырэп.

Апэрэ сабыир Альбинэ къы­зыфэхъум илъэс 20 ыныб­жьыгъ, Аланэ студент, илъэс 18 шIэхэу хъущт, медицинэ сэнэхьат ащ зэрегъэгъоты, Краснодар щеджэ. Аминэ ­илъэс 15 ыныбжь,я 9-рэ
классым ыуж еджапIэм чIэкIыгъ, ицIыкIугъом къыщегъэ­жьагъэу IэпэIасэу, ыIэ зэкIэми якIоу щытыти дизайнер сэнэхьатыр къыхихыгъ, Пшызэ къэралыгъо университетым епхыгъэ колледжым щеджэ. Аделинэ гурыт еджапIэу N 2-м ия 4-рэ класс щеджэ, адыгэ классым ис, илъэс пчъагъэрэ гимнастикэм ыгу рихьэу пылъыгъ, гъэхъэгъэшIухэри иIэх. Аринэ мыгъэ мы еджэпIэ дэдэм иапэ­рэ класс ис, апэрэ шIэны­гъэхэр зэрегъэгъотых. АнахьыкIэм — Эмилие ыныбжь бэмышIэу илъэ­ситIу хъугъэ.
— Сабыим насыпыр къыдэкIо, ахэм рэхьатныгъэ яIэным, япсауныгъэ зэщымыкъоным зыгъэпсэфыгъо симыIэу ыуж сит. Пшъашъэхэр зэкIэ зэфэшъхьафых, зы унагъо щапIух, ау яшэнхэр, ашIогъэшIэгъонхэр нэмыкIых, нэбгырэ пэпчъ нахь зыфэщэгъэ лъэныкъом зэрэ­хэзгъэхъощтым сыпылъ. Пстэуми апэу слъытэрэр гуфэбэныгъэ зэфыряIэу, цIыфыгъэ, гукIэгъуныгъэ ахэлъэу къэтэджынхэр ары. Сисабыйхэр спIунхэмкIэ сипщ-сигуащэхэм, сипщыжъ ышыпхъоу къэтщэжьыгъэу къыд­дисыр IэпыIэгъушхо къысфэ­хъух. Ахэм гъэсэпэтхыдэу араIорэр зыми пэпшIынэу щымытэу сэлъытэ. КIэлэцIыкIухэм алъэгъу­рэр хабзэ афэхъу, тиунагъокIэ адыгэ шэн-хабзэхэр зетэхьэх, нахьыжъым шъхьэкIафэ фэтэшIы, — еIо Альбинэ.
Гъужъыекъохэм яунагъо Iоф­тхьэбзэ зэфэшъхьафхэм ахэлэжьагъ, лIакъом ыцIэ чыжьэу агъэIугъ. Илъэс заулэкIэ узэ­кIэIэбэжьымэ, АР-м и ЛIышъхьэ ядэжь къэкIогъагъ. Унэгъо ныб­жьыкIэхэм зыкъызыщагъэлъэгъорэ зэнэкъокъоу «Унэгъо пыт — Урысые пыт» зыфиIорэм текIоныгъэ къыщыдахи Урысые фестивалэу «Вера. Надежда. Любовь» зыфиIорэм хэлэжьагъэх ыкIи ятIонэрэ чIыпIэ къыдахыгъ.
— Илъэс пчъагъэ тешIагъ нахь мышIэми, непэ фэдэу сыгу къэкIыжьы зызэрэфэдгъэхьа­зырыгъагъэр. МэшIокум тисэу фестивалым тыкIозэ, бзылъ­фы­гъэ горэ къыскIэрыхьи тыз­да­кIорэмкIэ къысэупчIыгъ. Зе­сэ­Iом, сыкъэмыщтэу сыгу илъыр сшIэнэу къысфигъэпытагъ. Ар сыгу исыубытэгъагъ ыкIи ишIуа­гъэ къысэкIыгъэу сэлъытэ, гугъэ къысхилъхьэгъэн фае. Урысыем ичIыпIэ зэфэшъхьаф­хэм къарыкIыгъэхэм ащыщэу осэ ин къытфашIи ятIонэрэ чIыпIэ къыт­фагъэшъошэгъагъ. Адыгэ шъуа­шэр тщыгъэу ти­республикэ ибаиныгъэ афэтIотагъ, адыгэ джэгу афызэхэтщэгъагъ. ТекIоныгъэ къызэрэдэтхыгъэр къызаIом, чIэсыр зэкIэ къэтэджыгъэу Iэгу къытфытеощтыгъэх, — къеIуатэ бзылъфы­гъэм.
Гъужъыекъохэм яунагъо гъэ­шIэгъоныбэ апэ къикIыгъ, зы чIыпIэ щымысхэу зэшъхьэгъу­сэхэри, якIэлэцIыкIухэри Iоф­тхьэбзэ зэфэшъхьафхэм ахэла­жьэх, чанэу зыкъагъэлъагъо.
Сабыибэ зэрыс унагъохэм хабзэр IэпыIэгъу зэрафэхъурэм мэхьанэшхо зэриIэр кIэухым Альбинэ къыхигъэщыгъ. Ящы­Iэныгъэ гъогукIэ ны мылъкур, унэгъо ныбжьыкIэхэм аратырэ сертификатым яшIуагъэ къэ­кIуагъ.
ДЕЛЭКЪО Анет.
Сурэтхэр: Гъужъыекъо унагъом ихъарзынэщ.