Тиныбджэгъу лъапIэхэр!
Тибзылъфыгъэ гохьхэр!

Фэбагъэ зыхэлъ мэфэкI шIагъом — ным и Мафэ фэшI ты­шъуфэгушIо!
Хэти анахь ыгъэлъэпIэрэ, ыгукIэ къыпэблэгъэ цIыфым — янэ зэ­рэфэразэр къыриIотыкIынымкIэ мы мэфэкIыр ушъхьагъу дэгъоу щыт. ИцIыкIугъом къыщегъэжьагъэу ныр зыфэгумэкIырэ сабыим гъуни-нэзи зимыIэ фэбагъэу ащ къыпкъырыкIырэр зэхешIэ, ащ ицыхьэ нахь зытелъыжьэу къэтэджынымкIи кIуачIэ ащ къыхелъхьэ, нэужым щыIэныгъэм хэгъо­зэнымкIэ, гъэхъагъэхэр ышIынхэмкIэ лъэпсэ къэкIуапIэу хъурэр ныр ары.
Дунаим сабый къытезыгъэхъорэ ыкIи зыпIурэ бзылъфыгъэ пэпчъ лъытэныгъэ фашIыныр къылэ­жьыгъ. «Ны» зыфиIорэ гущыIэр сыд фэдэрэ лъэхъани анахь агъэ­лъапIэщтыгъ ыкIи непи агъэлъэпIэрэ гущыIэу щыт.
Тихэгъэгу ыпашъхьэ ит анахь пшъэрылъ шъхьаIэхэм ащыщых ным уасэу фашIырэм зыкъегъэIэтыгъэныр, сабыибэ зэрыс уна­гъохэм фэгъэкIотэныгъэу яIэхэм ахэгъэхъогъэныр, къыткIэхъухьэхэ­рэм япIункIэ лъэпсэшхо зиIэ хэ­бзэ дахэхэр гъэфедэгъэнхэр.
Урысые Федерацием и Президентэу Владимир Путиным уна­гъом и Илъэс зэригъэнэфагъэм джыри зэ къегъэлъагъо унагъом игъэпытэн хэгъэгум ипащэхэм мэхьанэшхо зэрэратырэр.
Непэ зэкIэми анахь пшъэрылъ шъхьаIэу тиIэр нымрэ тымрэ обществэм уасэу щафашIырэр дгъэ­пытэныр, ным рэхьатэу икIэлэцIыкIухэр ыпIунхэр ыкIи неущ ахэм къарыкIощтым ыгукIэ фэрэ­хьатыныр ары.
ЗэкIэ бзылъфыгъэхэу кIэлэцIыкIухэр зиIэхэм, зыпIухэрэм, къа­Iызыхыгъэхэм яфэбэгъэ-гукIэгъу, япсэемыблэжьныгъэ апае лъэшэу тазэрафэразэр къэтэIо.
Псауныгъэ пытэ, насып, щыIэ­кIэшIу шъуиIэхэу, шъуиунагъохэм фэбагъэрэ зэгурыIоныгъэрэ ары­лъынэу, шIоу щыIэр зэкIэ къы­жъудэхъунэу шъуфэтэIо!
Адыгэ Республикэм и ЛIы­шъхьэу, Урысые политическэ партиеу «Единэ Россием»
и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр