Адыгеим ыкIи Пшызэ шъолъыр ащыпсэурэ быс­лъымэнхэм язичэзыу Зэфэс джырэблагъэ щы­Iагъ. ЗэкIэмкIи Iофтхьабзэм лIыкIо 94-рэ хэлэ­жьагъ, ахэм ахэтыгъ Краснодар краим къи­кIыгъэхэри.

АР-м и ЛIышъхьэу КъумпIыл Мурат ыцIэкIэ Iофтхьабзэм хэлэжьагъ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Ко­митет итхьаматэу Шъхьэлэхъо Аскэр.
Зэфэсыр зэрищагъ муфтиим игуадзэу, Iимамэу Хъущт ­Азэмат.
Зэхэсыгъом Iофыгъо зэфэшъхьафхэм щатегущыIагъэх. Ахэм ащыщых 2021-рэ илъэсым къыщегъэжьагъэу 2024-м нэс ДиндэлэжьапIэм IофшIэнэу ыгъэ­цэкIагъэм изэфэхьысыжьхэр, муфтиир, советым ыкIи лъытэкIо комиссием ахэтыщтхэр хэдзыжьыгъэнхэр.
Пэублэм Адыгеим ыкIи Пшызэ шъолъыр ащыпсэурэ быс­лъымэнхэм ямуфтиеу Къэрдэн Аскэрбый илъэсиплIым къы­кIоцI Iофэу ашIагъэм къытегущыIагъ.
Iофыгъо шъхьаIэу щытыгъэр муфтиим ихэдзыжьын ары. Къэ­зэрэугъоигъэхэм зэкIэми зэдырагъаштэу Къэрдэн Аскэрбый амакъэ фатыгъ ыкIи ар муф­тиеу хадзыжьыгъ.
«Аскэрбый Хьаджэбый ыкъом лъытэныгъэшхо къылэжьыгъ, IэпэIэсэныгъэшхо IэкIэлъ ыкIи обществэм игушъхьэбаиныгъэ мэхьанэу иIэр дэгъоу къыгурэIо, динлэжьхэм азыфагу зэгурыIоныгъэ илъыным фэIорышIэ» — къыщетхы КъумпIыл Мурат и Телеграмм-нэкIубгъо.
Адыгеим и ЛIышъхьэ къыхигъэщыгъ мамырныгъэр, зэгуры­Iоныгъэр, лъэпкъхэм, динхэм азыфагу илъ зэфыщытыкIэр гъэпытэгъэнхэм республикэм ибыслъымэнхэм яIахьышIу зэ­рэхашIыхьэрэр.
«Адыгеим щалэжьырэ ислъам диным ихабзэхэр къэухъумэ­гъэнхэр, цIыфхэм азыфагу шъхьэкIэфэныгъэ ыкIи зэгурыIоныгъэ илъыныр анахь шъхьа­Iэ­хэм ащыщ», — къыхигъэхъо­жьыгъ шъолъырым ипащэ.
КъумпIыл Мурат Къэрдэн Аскэрбый муфтиеу зэрэха­дзыжьыгъэмкIэ фэгушIуагъ, тапэкIи гъэхъагъэхэр ышIынхэу фэлъэIуагъ.
КIАРЭ Фатим.