«VK Места» зы­фи­Iо­рэ проектым дэлажьэхэрэм Адыгеим фэгъэхьыгъэ докумен­тальнэ фильм шы­шъ-
хьэIум тишъолъыр щы­тырахыгъ. Ар респуб­ликэм ичIыопс, икуль­турэ ыкIи ишхыныгъо­хэм афэгъэхьыгъ.

— ТичIыопс изытет ыкIи ащ ухэхьаным пае екIолIапIэу фэтшIыхэрэм, ахэр зэрэзэтедгъэ­псыхьэхэрэм зекIохэр нахьыбэу Адыгеим къырещалIэх. Урысыем ишъолъыр зэфэшъхьафхэм ­
ыкIи IэкIыб къэралыгъохэм къарыкIырэ хьакIэхэм зыщагъэпсэфыным пае Адыгеир къызэрэха­хырэм тегъэгушIо, — хигъэу­нэфыкIыгъ АР-м и ЛIышъхьэу КъумпIыл Мурат.
ЮНЕСКО-м и Дунэе кIэн хэ­хьэрэ чIыпIэу Лэгъо-Нэкъэ Iуа­шъхьэм, Мышъэкъо къушъхьэ тIуа­кIэу метрэ 200 зикууагъэм, Унэ-Къэжъ къушъхьэтхым техынхэр ащыкIуагъэх. Адыгеим ичIыопс ибаигъэ проектым игъэцэкIакIохэм аушэтыгъ.
Фильмыр тезыхыхэрэм рес­публикэм икультурнэ кIэн икъоу зыщагъэгъозагъ, АР-м и Лъэпкъ музей щыIагъэх, адыгэ шэн-­хабзэхэм нэIуасэ афашIыгъэх, мыIэ­рысэ чъыгхатэхэу Мыекъопэ районым итхэр зэрагъэлъэ­гъугъэх.
«Адыгэ Iан» зыфиIорэ шхапIэм хьакIэхэм лъэпкъ шхыныгъохэмкIэ къащапэгъокIыгъэх, ахэм яIэшIугъэ ауплъэкIугъ.
Рафтинг-гупчэу псыхъоу Шъхьэгуащэ тетыр зэрагъэшIагъ. Альпак­хэр зыщаIыгъ экофермэу «NE­Lama» зыфиIорэм экспедицием хэтхэр дэхьагъэх. Шъолъыр мэхьанэ зиIэ чIыопс ухъумапIэу Рыфабгъо ипсыкъечъэхыпIэхэм язекIо гъогууанэ щаухыгъ. Адыгеим ихьалэмэтыгъэ бэмэ нэры­лъэгъу афэзышIыщт фильмыр шъолъырымкIэ шъуашэ зэрэхъущтым щэч хэлъэп.