Лъэпкъ проектэу «ПсэупIэм­рэ къэлэ щыIакIэмрэ» зыфи­Iорэм къыдыхэлъытагъэхэм япхырыщын пае аштэгъэ федеральнэ проектэу «Псы къабзэм» Адыгеир зыхэлэжьэрэ 2019-рэ илъэсым къыщыублагъэу 2023-м нэс пштэмэ, псым епхыгъэу псэолъэ 27-рэ респуб­ликэм имуниципальнэ образо­ваниехэм ащашIыгъ е ащагъэ­кIэжьыгъ. Ахэм пстэумкIи сомэ миллион 765-рэ апэIуагъэхьагъ.
Проектым къызэрэдыхэлъытагъэу, псы къабзэр цIыфхэм аIэкIэзыгъэхьэрэ системэм игъэ­кIэжьын республикэм щы­лъагъэкIуатэ. Мы илъэсымкIэ псэолъи 6 агъэнэфэгъагъ. АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, ахэр пIалъэу апылъхэм адиштэу ашIых, нахьыбэр ­аухыгъ. IофшIэнхэм апэIухьэгъэ сомэ миллиони 162-м щыщэу миллиони 143,3-р федеральнэ бюджетым къыхэхыгъ.
Проектым къыдыхэлъытагъэу псыкъычIэщыпIэхэр Тэхъутэмыкъое районым ит къуаджэу Нэтыхъуае, поселкэу Отраднэм, Теуцожь районымкIэ къуаджэ­­хэу Нэшъукъуае, Пэнэжьыкъуае, поселкэу Лъэустэнхьаблэ, Джэ­джэ районым истаницэу Дондуковскэм ащагъэпсыгъэх.
Нэшъукъуае ипсыкъычIэщыпIэ игъэкIэжьын пстэумкIи сомэ миллион 15-м ехъу пэIуагъэ­хьагъ. Ащ икIэрыкIэу скважинэр щаубырыужьыгъ, башне кIэу агъэуцугъ, псыр зыгъэкъэбзэрэ псэуалъэр агъэпсыгъ, чIыпIэу къызэлъиубытырэр къашIы­хьагъ, зэрагъэфагъ. IофшIэнхэр ыкIэм факIох.
Къуаджэу Нэтыхъуае ща­шIыгъэ къычIэщыпIэм сыхьатым кубометрэ 25 — 30 къеты, башнеу агъэуцугъэр кубометрэ 50-м телъытагъ. ПстэумкIи псэуалъэм ишIын сомэ миллион 21,8-рэ пэIуагъэхьагъ.
Поселкэу Отраднэм щагъэуцугъэ къычIэщыпIэми сыхьатым къытырэ кубометрэ пчъагъэри, тырагъэуцогъэ башнем ифэщтыри зэфэдиз. ПстэумкIи сомэ миллион 22,1-м ехъу ащ щызэ­шIуахыгъэ IофшIэнхэм атефагъ.
Джэджэ районым ит станицэу Дондуковскэм щырагъэжьагъэм ишIын аухыгъ. Министерствэм къызэритыгъэмкIэ, ащ псыр къызчIэкIырэ скважинитIу кIэу щаубырыугъ, ахэм кIо­чIэгъу афэхъунэу башне кIэу тырагъэуцуагъ, нэмыкIэу ищыкIагъэхэр щагъэпсыгъэх, чIыпIэу къызэлъиубытырэр къашIы­хьагъ, зэтырагъэпсыхьагъ. А IофшIэнхэм зэкIэмкIи сомэ миллион 31-рэ фэдиз апэIухьагъ.
ХЪУТ Нэфсэт.