Мыщ фэдэ узым игъэхъужьынкIэ Iэзэгъу уцэу «Утжеф­ра» зыфиIорэм иапэрэ клиническэ ушэтынхэр ти­къэ­ралыгъо щаублагъэх.

Урысыем псауныгъэр къэухъумэгъэнымкIэ и Министерствэ гематологиемкIэ и Лъэпкъ медицинэ ушэтыпIэ Гупчэ ыгъэхьазырыгъ. IофшIэнхэр Лъэпкъ проектэу «Гъэсэныгъэм» къыдыхэлъытагъэх. ЗеIэзэгъэхэ нэуж узым къызфытыригъэзэжьыгъэхэм е нэмыкI IэзакIэу щыIэхэр IэпыIэгъу зыфэмыхъу­хэрэм мы Iэзэгъу уцыкIэр арахьылIэщт. АР-м игематологэу, лъым иадэбз узхэм зыщяIэзэхэрэ республикэ сымэджэщым и Гупчэ ипащэу Лагъуф Заринэ къызэриIуагъэмкIэ, а Iэзэгъу уцым сымаджэм ищыIэныгъэ лъигъэкIотэшъущт къодыеп, анахь лъыуз хэужъыныхьагъэ зиIэу, гъогогъу пчъагъэрэ Iэзэгъу уц лъэшхэр зэрахьылIагъэри ыгъэхъужьын ылъэ­кIыщт.
— CAR-T терапием ылъапсэр — сымаджэм ылъ Т-лимфоцитхэр къыхахыхэшъ, «С» рецептор къэзытыщтыр хагъа­хъо. Нэужым ар цIыфым, къыз­хащыгъэм, хагъэхъожьы. Ащ адэ­бзыр зыдэщыIэр къыхегъэщышъ, ащ «ео». НэмыкIэу къэпIон хъумэ, адэбз узым ебэныгъэным цIыфым иммунитет къыфегъэущы. Ащ Iоф зэришIэщтыр, ишIуагъэу къакIорэр зыфэдизыр ыкIи нэмыкIыбэр мы илъэсым ­къыкIоцI, клиническэ ушэтынхэр мэкIофэхэ, зэрагъэшIэщт, — къытфызэхифыгъ Iэзэгъу уцым «Iоф зэришIэщтыр» Лагъуф Заринэ.

КъэкIорэ илъэсым ушэтынхэр зыщыкIощтхэр гематологиемкIэ Лъэпкъ медицинэ ушэтыпIэ Гупчэр ары. ПстэумкIи нэбгырэ 60-мэ а уцыр ателъытагъ. ИщыкIагъэу алъытэмэ, шъолъырхэм ясымаджэхэр Гупчэм агъэкIонхэ алъэ­кIыщт. Ау ушэтынхэр ыкIэм зыфакIохэу, ишIуагъэ загъэунэфкIэ, Урысыем исы­мэджэщхэми ар аIэкIагъэхьащт. Охътэ благъэхэм Адыгеим нахь пэблагъэу, Ростов хэкум ыкIи Пшызэ шъолъыр, трансплантациемкIэ гупчэхэр къащызэIуахыщтых, мы Iэзэгъу уцыр ахэм ащагъэфедэшъущт. Ари сымаджэхэмкIэ нахь Iэрыфэгъу хъущт.
Непэ мы зигугъу къэтшIырэ узыр псынкIэу зызыушъомбгъухэрэм ящыщ. Дунаир пштэмэ, адэбз узхэмкIэ ар я 6-рэ чIыпIэм щыт. Адыгеим я 7-рэ ­чIыпIэр щеубыты. Къызхагъэщыхэрэм япчъагъэ илъэс къэс хэхъо. Арышъ, уцы­кIэм гугъэпIэшIухэр рапхых, сымэджэ нэбгырэ мин пчъагъэмэ ящыIэныгъэ лъагъэкIотэным иамал агъотыным щэгугъых. ЗэрэрахъухьагъэмкIэ, ар Урысыем къыщыдагъэкIыщт. Ащ фы­тегъэпсыхьэгъэ Гупчэм ишIын 2026-рэ илъэсым аухынэу рахъухьэ.
Сурэтхэр: А.Лаутеншлегер.