Урысые гуманитар телевизионнэ олимпиадэу «Умницы и умники» зыфиIорэм Мыекъуапэ щыщ Святослав Полиныр хэлэжьагъ ыкIи Адыгеир зэрифэшъуашэу къыщигъэлъэгъуагъ.

Святослав ицIыкIугъом къыщегъэжьагъэу илэгъухэм къахэщэу, лъэныкъо зэфэшъхьафхэмкIэ сэнаущыгъэ ин хэлъэу щыт. Гимназиеу N 22-м ия 11-рэ класс ис, дэгъоу еджэ, къэлэ ыкIи рес­публикэ зэнэкъокъу зэфэшъхьафхэм текIоныгъэ, хагъэунэфыкIырэ чIыпIэхэр ренэу къащыдехых.
— Илъэс пчъагъэ хъугъэу «Умницы и умники» зыфиIорэм ишъолъыр уцугъо республикэм щызэхэтэщэ, Адыгеим иныбжьыкIэ анахь чанхэр ащ хэлажьэх, яшIэныгъэхэм ахагъахъо. Мы илъэсым Святослав ары анахь шIэныгъэ куухэр къэзыгъэлъэгъуагъэр ыкIи Москва кIонышъ, телекъэтыным хэлэжьэнэу инасып къыхьыгъ. БэмышIэу тыкъэкIожьыгъ, Святослав лъэныкъо пстэумкIи шIэныгъэ куу къыгъэлъэгъуагъ. ЛитературэмкIи, тарихъымкIи дэгъоу гъэхьазырыгъэу, упчIабэм яджэуп ышIэу щытыгъ. Ша­пхъэу джэгуным пылъхэр зэбламыхъугъагъэмэ, «дорожкэм» къеджэнхэу щытыгъ. Арэу щытми, теоретикэу медаль къыфагъэшъошагъ. Къыхэгъэщыгъэн фае мы аужырэ илъэсихым Адыгеим икIыгъэхэм апэрэу мыщ фэдэ медаль къазэрафагъэшъошагъэр, ащ осэшхо фэтэшIы, — еIо сэнэхьат IэпэIэсэныгъэм хэгъэхъо­гъэнымкIэ Адыгэ республикэ институтым иIофышIэу, олимпиадэм ишъолъыр уцугъо изэхэщэнкIэ пшъэ­дэкIыжь зыхьырэ Сергей Булгаковым.
КIэлэ ныбжьыкIэр шIэныгъэ зэрэзэригъэгъотыщтым сыдигъокIи ыуж ит. Лъэныкъо зэфэшъхьафхэмкIэ сэнаущыгъэ хэлъэу, шIэныгъэ куу иIэу зэрэщытым фэшI Мыекъуапэ имэр ыгъэнэфэгъэ стипендиер ащ къыраты. Къэлэ ыкIи республикэ олимпиадэ зэфэшъхьафхэм тарихъымкIэ ыкIи обществознаниемкIэ ахэлажьэ. Республикэ зэнэкъокъоу «Уифитыныгъэхэр ошIэха?» зыфиIорэм хэлажьи, апэрэ шъуашэ зиIэ дипломыр къыратыгъ.
Святослав еджэным имызакъоу, спортымкIи гъэхъагъэхэр иIэх, атлетикэ онтэгъумкIэ къэлэ ыкIи республикэ зэнэкъокъухэм ахэлажьэ, текIоныгъэ, хагъэунэфыкIырэ чIыпIэхэр къащыдехых. КIалэм зэрилъытэрэмкIэ, еджэным спортыр пэрыохъу фэхъурэп, тIуми хэхъоныгъэ уагъэшIы. ГъэрекIо Урысые зэнэкъокъоу республикэм щызэхаща­гъэм хэлэжьагъ, мыгъэ спортым имастер хъунымкIэ кандидат хъугъэ, исурэт еджапIэм къыпалъагъ.
— Мы интеллектуальнэ джэгукIэм сыхэлэжьэнэу синасып къызэрихьыгъэм сырэгушхо, упчIабэмэ яджэуап сшIэ­щтыгъ, ау чэзыу-чэзыоу яупчIыщтыгъэх, бэ тыхъущтыгъ. Уцугъуищэу гощыгъэу телекъэтыныр тырахыгъ. Мафэ къэс сыхьатыр 12-м къыщегъэжьагъэу 9-м нэс тыщыIэщтыгъ, мэфищми темэ гъэшIэгъонхэмкIэ упчIэхэр къатыгъэх. Осэ ин зыфэсшIырэ медалыр ятIонэрэ мафэм къэсылэжьыгъ, тхакIоу Марк Твен упчIэр ехьылIэгъагъ. Тарихъымрэ литературэмрэ сыгу рехьых, еджэгъу сыхьатхэм къахэмылъытагъэу мы предметхэр нахь игъэкIотыгъэу зэсэгъашIэх. Тарихъым­кIэ шIэныгъэ куухэр сиIэнымкIэ сятэ IэпыIэгъу къысфэхъу, — къы­Iуагъ Святослав.
КIэлэ ныбжьыкIэм ишIэныгъэхэр къы­зэригъэлъэгъуагъэм, зэрахигъэхъуагъэм адакIоу Урысыем ишъолъыр зэфэ­шъхьафхэм къарыкIыгъэ илэгъухэм нэIуасэ зэрафэхъугъэр игуапэу къыти­Iуагъ. Къэбэртэе-Бэлъкъар, Къэрэщэе-Черкес республикэхэм, Дагъыстан ыкIи нэмыкI чIыпIэхэм къарыкIыгъэхэм гущыIэгъу афэхъугъ, хэти зыщыпсэурэ республикэм кIожьыгъэми, зэщыгъуп­шэхэрэп, телефонкIэ зэдэгущыIэх, ягъэ­хъагъэхэр зэфаIуатэх.
ДЕЛЭКЪО Анет.
Сурэтыр: Святослав Полиным
ихъарзынэщ.