Адыгеим шахматхэмкIэ ифедерацие иапэрэ пащэу Джыгунэ Къадырбэч ишIэжь фэгъэхьыгъэ турнир Мыекъуапэ щэкIо. Мы спорт лъэпкъыр зыгу рихьырэ нэбгырэ 29-рэ зэнэкъокъух. Республикэм имызакъоу, тигъунэгъу Краснодар краим илIыкIохэри мыщ хэлажьэх.

ЗэхэщакIохэм зэрагъэ­нэфагъэу, зэнэкъокъур швейцарскэ шIыкIэм тетэу рагъэкIокIы, ащ тури 7 къыдыхэлъытагъ.
Iофтхьабзэр шэкIогъум и 16-м рагъэжьагъ. Турищым ыуж пэрытныгъэр аIыгъ Николай Удовиченкэмрэ Артем Литвиновымрэ. Мы нэбгыритIум джыри очко чIанагъэп. Ау ешIэгъу шъхьаIэхэр мы тхьаумафэм щыIэщтых, я 7-рэ турым изэфэхьысыжьхэм къагъэлъэгъощт текIоныгъэр ыкIи хагъэ­унэфыкIырэ чIыпIэхэр къыдэзыхыгъэхэр.