ГандболымкIэ Урысыем и Кубок икъыдэхын хэлэжьэрэ командэхэм зичэзыу ешIэгъухэр яIагъэх. Мыекъопэ «АГУ-Адыифым» Уфа щыриIэгъэ зэIукIэгъур шIуахьыгъ ыкIи зэнэкъокъум къыхэзыгъ. Тикомандэ къытекIогъэ «Уфа-Алисэр» апшъэрэ лигэм я 7-рэ чIыпIэр щиIыгъ.

Адыгеим иклуб ипащэхэм Башкортостан икъэлэ шъхьаIэ спортсменкэ 12 агъэкIуагъэр. Командэм икапитанэу Кобл Зуретэ, иешIакIохэу Ирина Бондаренкэмрэ Елизавета Краснокутскаямрэ, икъэлэпчъэIутэу Людмила Баскаковар зэнэкъо­къум хэлэжьагъэхэп.
Я 12-рэ такъикъым къыщегъэ­жьагъэу бысымхэр тапэ ишъыгъэх ыкIи зэIукIэгъур аухыфэкIэ ахэр къызэкIэкIуагъэхэп, пчъа­гъэр 33:29-у ешIэгъур ахьыгъ.