Дзэ-социальнэ гупчэм иIофшIэн ригъэжьагъ
УФ-м зыкъэухъумэжьынымкIэ и Министерствэ и Дзэ-социальнэ гупчэ икъутамэ шъолъыр фондэу «Хэгъэгум иухъумакIохэр» зыфиIорэм къыщызэIуахыгъ. Ащ фэгъэхьыгъэ Iофтхьабзэм хэлэжьагъэх АР-м иминистрэхэм я Кабинет и Тхьаматэ игуадзэу, финансхэмкIэ министрэу Виктор Орловыр, Къэралыгъо Совет — Хасэм идепутатэу, Урысыем и ЛIыхъужъэу Цэй Эдуард.
Гупчэм пшъэрылъ шъхьаIэу иIэр — хэушъхьафыкIыгъэ дзэ операцием мы уахътэ хэлажьэхэрэм яфитыныгъэхэр къэухъумэгъэнхэр ыкIи социальнэ IэпыIэгъу ягъэгъотыгъэныр. А фэIо-фашIэхэр лъэныкъо зэфэшъхьафхэмкIэ гъэпсыгъэщтых: медицинэр, социальнэ фэгъэкIотэнхэр, субсидиехэр.
— Дзэ-социальнэ гупчэр къызэIуахынэу зэрэрахъухьагъэр тэрэз ыкIи игъу. Фондым ипшъэрылъхэр зытетыгъэм тетэу лъигъэкIотэщтых, хэушъхьафыкIыгъэ дзэ операцием иветеранхэм, хэкIодагъэхэм яунагъохэм къырахьылIэрэ гумэкIыгъохэр зэшIуихыщтых. Дзэ гупчэр анахьэу зыфэгъэзэгъэжьыщтыр дзэ операцием хэлэжьахэрэр ыкIи ахэм яунагъохэр ары. Мыщ ишIуагъэкIэ дзэкъулыкъушIэхэм уахътэ амыгъэкIодэу игъом ыкIи псынкIэу ящыкIэгъэ фэIо-фашIэхэр афагъэцэкIэщт, — хигъэунэфыкIыгъ фондэу «Хэгъэгум иухъумакIохэр» зыфиIорэм ишъолъыр къутамэ ипащэу ПIатIыкъо Аслъан.
Министрэу Виктор Орловым Дзэ-социальнэ гупчэр зэрэзэтырагъэпсыхьагъэм осэшIу фишIыгъ ыкIи щыкIагъэ горэ яIэмэ зэригъэшIагъ. Хэбзэ къулыкъухэр сыдигъокIи мыхэм IэпыIэгъу афэхъунхэм зэрэфэхьазырхэр къыIуагъ.
— ЦIыфхэм Iоф адэшIэгъэныр IэшIэхэп, шъо а лъэныкъомкIэ IэпэIэсыныгъэ шъуIэкIэлъ хъугъэ. ШIуагъэ къытэу шъиуIофшIэн лъыжъугъэкIотэнэу шъуфэсэIо, тилIыхъужъхэм яфэIо-фашIхэр игъом зэрэжъугъэцэкIэщтхэм сицыхьэ телъ, — хигъэунэфыкIыгъ Цэй Эдуард.
Дзэ-социальнэ гупчэм фэгъэзагъэр социальнэ координаторэу Сергей Артюшенкэр ары. Мыщ ищыкIэгъэ еджэнхэр ыкIугъэх, Iоф зэрадишIэщтыр зэригъэшIагъ.
— ДзэкъулыкъушIэхэм ыкIи ахэм яунагъохэм Iофыгъоу къытахьылIэхэрэр «зы шъхьангъупчъэ» шIыкIэм тетэу афызэшIотхыщтых. УФ-м зыкъэухъумэжьынымкIэ и Министерствэ и Дзэ гупчэ изыкI къэбарлъыгъэIэс системэ ар итэгъахьэшъ, къызкIэлъэIухэрэ документхэр адэтэгъэпсых, — къыIуагъ Сергей Артюшенкэм.
Iэшъынэ Сусан.