ШэкIогъум и 19-м ракетыдзэхэм ыкIи артиллерием я Мафэ фэгъэхьыгъэ мэфэкI Iофтхьабзэ культурэм и Унэу «Гигантым» щыкIуагъ. Ащ кIэщакIо фэхъугъ АР-м иветеранхэм я Совет.

Iофтхьабзэм хэлэжьагъэх хэбзэ къулыкъухэм, патриотическэ ыкIи общественнэ организациехэм ялIыкIохэр, хэгъэгу кIоцI IофхэмкIэ органхэм якъу­лыкъушIэхэр.
Къэзэрэугъоигъэхэм шIуфэс гущыIэхэмкIэ закъыфигъэзагъ АР-м иветеранхэм я Совет итхьаматэу Къуаджэ Аслъан. Артиллеристхэр гъэхьазырыгъэн­­­хэмкIэ Адыгеир сыдигъокIи кIыщэу зэрэщытыр ащ къыхигъэщыгъ.
— Хэгъэгу зэошхом илъэ­хъан ахэм ящытхъу тыдэкIи щызэлъа­рагъэшIагъ. Нэужыми тятэжъхэм къытхалъхьэгъэ хэбзэшIухэм, дзэ IофымкIэ IэпэIэсэныгъэм атетэу советскэ артиллерием нахьышIур къахихыгъ, наукэм ыкIи техникэм ягъэхъэгъэшIу­хэм ахигъэхъуагъ. Непэ хэушъхьафыкIыгъэ дзэ операциер зыщыкIорэ лъэхъаным тиартиллеристхэм ядзэ пшъэрылъхэр щытхъу хэлъэу агъэцакIэх, ахэм мэхьанэшхо яI. ДзэкIолI-артил­леристхэр мы уахътэм лъэшэу ящыкIагъэх. Ахэм яIофшIэкIэ тэрэз епхыгъ нэбгырэ мин пчъагъэхэм ящыIэныгъэ ыкIи мэхьанэ зиIэ дзэ операциехэм язэшIохын, — хигъэунэфы­кIыгъ Къуаджэ Аслъан.
Джащ фэдэу ветеранхэм я Совет итхьаматэ артиллерийскэ дзэхэм ятарихъ къыIотагъ. Урысыем идзэхэм ар анахьыжъ, артиллериер агъэфедэу заублагъэр я XIV-рэ лIэшIэгъур ары. Тикъэралыгъо артиллеристхэм ямэфэкI щыхагъэунэфыкIыныр илъэс 70-кIэ узэкIэIэбэжьмэ рагъэжьагъ. ШэкIогъум и 19-м зыкIытыраубытагъэми хъишъэ пылъ. А мафэм, 1942-рэ илъэсым мэхьанэ зиIэ операциеу «Уран» зыфиIорэр аублагъ. Хэгъэгу зэошхом илъэхъан Сталинград дэжь щыкIогъэ зэпэуцужь лъэшым пыим текIонхэм мыр къэгъэзапIэ фэхъу­гъагъ. Зэо мэшIошхоу артиллерием аришIылIагъэм ишIуагъэкIэ фронтым икъыблэ-къохьапэкIэ пыим чIэнэгъэшхо щишIыгъ.
АР-м и ЛIышъхьэу КъумпIыл Мурат ыкIи депутатхэм ацIэкIэ зимэфэкIхэм къафэгушIуагъ Къэралыгъо Советым – Хасэм и Тхьаматэ игуадзэу, Урысыем и ЛIыхъу­жъэу Цэй Эдуард. Сыд фэдэрэ лъэхъани ракеты­дзэхэм ыкIи артиллерием ямэхьанэ зэрэиныр ащ къы­хигъэщыгъ.

— Хэгъэгу зэошхом илъэ­хъан «заом итхьэу» артиллериер алъытэщтыгъ. Советскэ артиллерист-ракетчикхэм лIыхъужъныгъэу, псэемыблэжьныгъэу, пытагъэу къа­хэфагъэр агъэшIагъощтыгъ, ТекIоныгъэр къыдэхыгъэным ахэм яIахьышIу халъхьагъ. Джыри непэ Хэгъэгур къэ­ухъумэгъэнымкIэ ахэм апшъэ илъыр бэ, — хигъэунэфыкIыгъ Цэй Эдуард.
Джащ фэдэу зимэфэкIхэм къа­фэгушIуагъэх Къыблэ дзэ округым изэхэт стратегическэ командование иинспектор куп хэт генерал-майорэу Александр Дорофеевыр, Мыекъопэ къэлэ администрацием ипащэ игуадзэу генерал-лейтенантэу Юрий Томчак, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, IофшIэнымкIэ ыкIи социальнэ хэхъоныгъэмкIэ министрэм игуадзэу Даур Руслъан. Ветеран чанхэу республикэм иобщественнэ щыIэныгъэ зиIахьышIу хэзылъхьэхэрэм, къыткIэхъухьэрэ лIэужхэм япатриотическэ пIуныгъэ дэлажьэхэрэм рэзэныгъэ ыкIи щытхъу тхылъхэр аратыгъэх.
МэфэкI Iофтхьабзэр респуб­ликэм итворческэ купхэм къагъэхьазырыгъэ концертымкIэ аухыгъ.
Iэшъынэ Сусан.
Сурэтхэр: Артур Лаутеншлегер.