ЗекIохэм апае фестивалэу «Осенняя хвастовня» ­зыфиIорэр шэкIогъум и 30-м Адыгеим щыкIощт. ПшъэдэкIыжь гъэнэфагъэ зыхьырэ обществэу «ЗекIо Адыгеир» зыфиIорэм ар зэхищэщт. Теуцожь районым ит къуаджэу Гъобэ­къуае культурэм и Унэу дэтым пэIулъ паркым пчэдыжьым сыхьатыр 10-м Iофтхьабзэр щырагъэ­жьэщт.

IэпэIасэхэм ядесэхэр, яIэшIагъэ­хэр къызщагъэлъэгъощт ермэлыкъыр фестивалым щызэхэщэгъэщт. Фес­тивалым къекIолIэщтхэм Теуцожь Цыгъо и Унэ-музей, сурэт къэгъэлъэгъуапIэм зыщаплъахьан ­алъэкIыщт, концерт къафатыщт, адыгэ шхыныгъохэмкIэ агъэшIощтых. Фес­тивалым узэрэхэлэжьэщтым ыпкIэ хэлъэп, хьакIэхэр чIыпIэм нэзыгъэ­сыщтхэ транспортыр къыдыхэлъытагъ.
— Бжыхьэ IофшIэнхэр зэшIохыгъахэх, цIыфхэм кIымафэм зыфагъэ­хьазырыгъ. Уишъэогъухэм уахэхьаным, щаибжъэ IэшIу уадешъоным иохътэ дахэ къихьагъ. ИлъэсыкIэ шIухьафтынхэм ягъэхьазырын, псэр, унэр зыгъэфэбэрэ IэшIу-IушIухэм яшIын пстэури ягупшысэх, — аIо фестивалым изэхэщакIохэм ыкIи зэкIэ ащ хэлажьэ зышIоигъохэр къырагъэблагъэх.
Нахь игъэкIотыгъэ къэбар фаехэр фестивалым изэхэщакIохэм мы телефонымкIэ афытеонхэ алъэ­кIыщт: +7 928 668 29 47