Напэ зиIэм лIыгъэ иI
(ГущыIэжъ)

Бжыхьакъо Къымчэрые шэкIогъум и 15-м, 1919-рэ илъэсым къуаджэу Лъэустэнхьаблэ къыщыхъугъ, адыгэ лэжьэкIо унагъо щапIугъ.

1938-рэ илъэсым Краснодар гурыт имыкъу еджапIэр къыщиухи Адыгэ кIэлэегъэджэ училищым чIэхьагъ. Дзэ къулыкъум Iоныгъом ыкIэм 1940-рэ илъэсым кIуагъэ. Ащ полковой еджапIэр къыщиухыгъэ къодыеу Хэгъэгу зэошхор къежьагъ.
Бжыхьакъор апэрэ зэо мафэхэм къащегъэжьагъэу заор аухыфэкIэ фронтым Iутыгъ. Къыблэм, Къыблэ-Къо­хьапIэм, Воронежскэм ыкIи а I-рэ Украинскэ фронтхэм яминомет взвод хэтэу, отделением икомандирэу зэуа­гъэ. 1941 – 1942-рэ илъэсхэм псы­хъоу Прут, къалэхэу Котовскэ, Полтавэ, Ромны ыкIи Москва адэжьхэм ащыкIогъэ зэо хьылъэхэм ахэлэжьагъ. Пыир зэкIадзи, тидзэхэр ащ текIуа­тэхэзэ, къалэхэу Камира, Серпухов, Венев, нэмыкIхэри шъхьафит ашIыжьыгъэх.
Мэлылъфэгъу мазэм, 1945-рэ илъэсым гвардием истаршэ лейтенантэу, а I-рэ Украинскэ фронтым икавалерийскэ гвардейскэ дивизие хэтэу Бжыхьакъор псыхъоу Эльбэ штэгъэным ыкIи Германием икъалэу Майсен дэжь щыкIогъэ зэошхохэм ахэлэжьагъ. Пыир ыкIуачIэкIэ бэкIэ нахь зэтегъэпсыхьэгъагъэми, тисоветскэ дзэкIолIхэм ыкIи офицерхэм яхэгъэгу шIулъэгъу кIуачIэ къахилъхьэу фашист-техакIохэм апэуцужьыгъэх. Бжыхьакъом мы чIыпIэм илIыхъужъныгъэ къыщылъэгъуагъ, танкхэм акIэримыгъахьэхэу, ягъогу зэпибзыгъ, пулемети 5 ыгъэкIодыгъ ыкIи нэмыц нэбгырэ 50 фэдиз ыукIыгъ. ЛIыблэнэгъэ-лIыхъу­жъныгъэу Бжыхьакъом зэрихьагъэм къэралыгъо тын лъапIэр ­къыкIэкIуагъ.
СССР-м и Апшъэрэ Совет и Президиум и УнашъокIэ мэкъуогъум и 27-м, 1945-рэ илъэсым командованием идзэ пшъэрылъ инхэр щысэтехыпIэу зэригъэцэкIагъэм, лIыгъэшхоу ыкIи псэемыблэжьныгъэу къыгъэлъэгъуагъэм апае Бжыхьакъом щытхъуцIэ анахь инэу «Советскэ Союзым и ЛIыхъужъ» зыфиIорэр, Лениным иорден ыкIи медалэу «Дышъэ Жъуагъор» къыфагъэшъо­-
шагъэх.
Зэо ужым Къымчэрые СССР-м и УIэшыгъэ КIуачIэхэм къулыкъур ащылъи­гъэкIотагъ. 1947-рэ илъэсым офицерхэм яшIэныгъэхэм ахэгъэхъогъэнымкIэ курсхэр, 1949-м – «Выстрел» зыфиIорэ курсхэр къыухыгъэх. 1967-рэ илъэсым полковникыцIэр иIэу Бжыхьакъор дзэм къыхэкIыжьыгъ, Краснодар щыпсэугъ ыкIи МВД-м иорганхэм Iоф ащишIагъ. НыбжьыкIэхэм япатриотическэ-пIуныгъэ псыхьэгъэным чанэу хэлэжьагъ.
Бжыхьэкъо Къымчэрые Борэкъо ­ыкъор чъэпыогъум и 28-м, 1991-рэ илъэсым дунаим ехыжьыгъ. ЛIыхъужъыр икъуаджэу Лъэустэнхьаблэ щагъэтIылъыжьыгъ.