Уилъэпкъ уимылъапIэу, цIыфхэр уимыкIасэу уусэкIони, укомпозиторыни, искусствэм уилъагъо щыпхырыпщыни плъэкIыщтэп.
Гум къикIэу псэм щыщ хъурэр ары искусствэм ыштэрэр. Мы лъэгъо гъэшIэгъоным тетыгъ ыкIи рыкIуагъ шIукIае шIагъэу къытхэмытыжьэу, ау мэпсэуфэ лирикэ мэкъамэхэр хэхыгъэнхэмкIэ Iофышхо зылэжьыгъэу, адыгэ орэдыр зикъабылыгъэу, лъэпкъ музыкэр зыгъэбаигъэу, иорэд дахэхэмкIэ цIыфхэм агухэм къарынагъэу Натхъо Джанхъот.

Ар шэкIогъум и 18-м, 1941-рэ илъэсым Тэхъутэмыкъуае къыщыхъугъ. Мыекъопэ музыкальнэ училищым идирижер-хор отделение 1965-рэ илъэсым чIахьи, дэгъоу щеджагъ. Мы еджапIэм чIэсызэ орэдхэр ытхыхэу ригъэжьэгъагъ. Натхъо Джанхъот IофшIэныр 1970-рэ илъэсым лъэпкъ творчествэм и Унэ методистэу щыригъэжьагъ.
Iоф ышIэзэ 1980-рэ илъэсым Адыгэ къэралыгъо кIэлэегъэджэ институтым имузыкальнэ-педагогическэ факультет къыухыжьыгъ.
Композиторэу Натхъом иорэдхэм ащыщхэр пластинкэхэм атыратхагъэх Шъэожъ Розэ, Жэнэ Нэфсэт, Анзэрэкъо Чеслав. Ащ иорэдхэр бэрэ Адыгэ радиомкIэ зэлъыIущтыгъэх. Джанхъот имэкъамэхэр гохьых, шъабэх, адыгэ лъэпкъ орэдхэм яфэмэ-бжьымэ акIэт; ахэр орэдус-лирикым ыбгъэгу щытIэмыгъэх, щыIэныгъэм, цIыфхэм шIулъэгъу инэу афыриIэр дахэу зыщыкIэщыгъэх. Натхъом иорэдхэр зыдэт тхылъ заулэ къыдигъэкIыгъ: «Насып жъуагъу», «Сиорэд» ыкIи «Сыдэу дахэ мы дунаир» зыфиIорэм орэд 20 тхакIоу, усакIоу МэщбэшIэ Исхьакъ игущыIэхэм арылъэу къыдэхьагъ.
Натхъо Джанхъот илирическэ орэдхэу «Дахэ сидунай» (гущыIэхэр – МэщбэшIэ Исхьакъ), «СинэшIуцIэ дах» (гущыIэхэр – ЯхъулIэ Сэфэр) «Сыда къэхъугъэр джы?» — орэдышъори гущыIэхэри ежь Джанхъот иех. Джащ фэдэу «Си Адыгей» (гущыIэхэр КъумпIыл Къадырбэч), «Укъе­сэгъэблагъэ Адыгеим» (гущыIэхэр зиер П. Кощбаер), мыхэм анэмыкIхэри ыусыгъэх, ахэр иорэд сборникхэм адэтых.
Натхъо Джанхъот композитор къодыягъэп, мэкъэ гохь иIагъ, ыусыгъэхэр цIыфхэм афакIозэ, итворчествэ пэблагъэ хъущтыгъэх. СССР-м илъэхъан, я 80-рэ илъэсхэм якIэухым, Натхъо Джанхъот творческэ зэIукIэгъухэр адыгэ диаспорэу Сирием, Тыркуем, Иорданием ыкIи Болгарием арысхэм адыриIагъэх. Ахэм сыдигъуи цIыфыбэ къякIуа­лIэщтыгъ.
Натхъом хорым паекIэ произведение 25-рэ фэдиз ыусыгъ. Къыхэгъэщыгъэн фае камернэ Iэмэ-псымэ произведениехэри бэу зэриIэхэр, ау анахьэу Адыгэ драматическэ театрэм гъусэныгъэ дыриIэу, спектаклэхэу «Дэхэбаринэ ихьакIэщ», «Шъэожъыемрэ нэгъучIыцэмрэ», мыхэм анэмыкIхэми музыкэр зэрафитхыгъэр.
Натхъо Джанхъот илъэсыбэрэ Iоф зыщишIагъэр Адыгэ республикэ телерадиокомпаниер ары, ащ музыкальнэ редактор шъхьаIэу щылэжьагъ. ИкIэлэгъу-ныбжьыкIэгъум къыщегъэжьагъэу музыкэр икIасэу, орэдыр ыусэу ыкIи къыIоу илъэпкъ итворчествэкIэ ыгъэ­шIуагъ, зэфэдэкIэ Адыгэ хэкум ымакъэ щыIугъ, 1992-рэ илъэсым щытхъуцIэу «АР-м культурэмкIэ изаслуженнэ IофышI» зыфиIорэр къыфагъэшъошагъ. Гум имэкъамэхэр иадыгэ лъэпкъ ыIэтэу, аригъашIэу ащ хихыгъэх ыкIи орэд дэхэ закIэхэу къыфигъэнагъэх. Джанхъот цIыф рэхьатыгъ, гупсэфыгъ, лирик шъэбагъ. Къызыхъугъэ мафэм ыцIэ епIоныр, идахэ пIэтыныр къылэжьыгъ.
НэкIубгъор зыгъэхьазырыгъэр
Мамырыкъо Нуриет.