Хэгъэгум изэхэубытэгъэ стенд тегъэпсыхьагъэу Анкара щыкIогъэ къэгъэ­лъэгъоным зекIонымкIэ амалэу иIэхэр Адыгеим къыщигъэ­лъэ­гъуагъэх.

ШэкIогъум и 14-м къыще­гъэжьагъэу и 17-м нэс дунэе къэгъэлъэгъонэу «Тravel Expo Ankara» зыфиIорэр къалэу Анкара щыкIуагъ. Апэрэу стратегическэ къыхэхынхэмкIэ Гупчэм Урысыем зекIонымкIэ амалэу иIэхэр ащ къы­щигъэлъэгъуагъэх.
Iофтхьабзэм хэлэжьагъ УФ-м экономикэ хэхъоныгъэмкIэ иминистрэ игуадзэу Владимир Ильичевыр. Хэгъэгум илIыкIо куп хэтыгъэх Урысыем ишъо­лъыриблымэ ялIыкIохэр. Адыгэ Республикэм илIыкIо купи ахэм зэу ащыщыгъ. Республикэм и ЛIышъхьэу КъумпIыл Мурат пшъэрылъ зэрафишIыгъэм тетэу Адыгеим ыцIэкIэ ащ щыIагъэх АР-м зекIонымкIэ ыкIи зы­гъэ­псэфыпIэхэмкIэ и Комитет итхьа­матэу Былымгъот Ибра­хьим, АР-м и ЛIышъхьэ иIэпы­Iэгъоу Хьакъунэ Бэллэ, АР-м игупчэу «Сибизнес» зыфиIорэм ипащэу КIыкI Артур, Адыгеим зекIонымкIэ ибизнес ипащэхэр ыкIи иIофышIэхэр.
Джащ фэдэу къэгъэлъэгъоным хэлэжьагъэхэм ащыщых Чэчэн Республикэр, Республикэу Татарстан, Краснодар краир, Твер­скэ хэкур, Санкт-Петербург ыкIи Москва. ЗэкIэ шъолъырхэр Урысые Федерацием изэхэубы­тэгъэ стендэу «Discover Russia» зыфиIорэм хэлэжьагъэх. ЗэхэщакIохэм зыкIэ ащыщыгъ Урыс унэу Анкара дэтыр (Россотрудничествэм илIыкIо IофшIапI). Iофыгъо шъхьаIэу анаIэ зытырагъэтыгъэр псауныгъэм икъэу­хъумэн, IофшIэным, культурэм ыкIи спортым япхыгъэ зекIоным зегъэушъомбгъугъэныр ары.

«Илъэс хъугъэу шъолъырхэм чанэу тадэлажьэ, IэкIыб къэралхэм къарыкIыгъэ хьакIэхэм яфэныкъоныгъэхэм атегъэпсы­хьагъэу яIофшIэн нахьышIоу зэ­рэзэхащэщтым фэтэгъасэх, зекIоным епхыгъэ продукцие гъэшIэгъонхэр къыхахынхэмкIи тадеIэ. Урысые Федерацием ишъолъыриблымэ ялIыкIохэр тигъусэхэу апэрэу дунэе лъэга­пIэм тетэу зекIонымкIэ амалэу щыIэхэр къэдгъэлъэгъощтых. Проект иным игъунапкъэхэм атегъэпсыхьагъэу зекIоным епхы­гъэ Iофыгъохэм язэшIохын­кIэ Урысыер хэпшIыкIэу ыпэкIэ лъыкIотэным иамал едгъэгъотын тлъэкIыщт», — къыIуагъ дунэе зекIоным хэхъоныгъэ егъэшIыгъэнымкIэ Гупчэм ипащэу Юлия Максутовам.

Хэгъэгу 30-мэ ялIыкIохэр Iофтхьабзэм хэлэжьагъэх. Анахь мэхьанэ зиIэхэм ащыщ къэ­гъэ­лъэгъонэу «Тravel Expo» зы­фи­Iорэм илъэхъан зышIоигъохэм адыгэ культурэм ибаиныгъэ нэ­Iуасэ зыфашIын зэралъэкIыгъэр. Купэу «Мыст» зыфиIорэм ыкIи дышъэидэнымкIэ Акъущэ Фатимэ иIэпэIэсэныгъэ зэра­гъэлъэгъугъ. Адыгэ культурэм ашIогъэшIэгъонэу зыщагъэгъозагъ, тишъолъыри анаIэ нахь къытырадзагъ.

Нахь игъэкIотыгъэу респуб­ликэм ыкIи зекIонымкIэ ащ ама­лэу иIэхэм стендымкIэ нэ­Iуасэ зафашIын алъэкIыгъ. Зы­гъэпсэфыпIэу «Лэгъонакъэрэ» зекIонымкIэ паркэу «ДжэгокIо гъэхъунэр» зыфиIорэмрэ япроектхэми защагъэгъозагъ. Непэ Республикэм ихэбзэ къулыкъу­хэм анаIэ анахьэу зытырадзагъэр транспорт ыкIи инженер инфраструктурэм хэхъоныгъэ егъэшIыгъэныр ары. Нэужым ащ амал къытыщт зекIонымкIэ индустрием лъэшэу хэхъоныгъэ ышIынымкIэ, экономикэм гъэ­псы­кIэу иIэм зэхъокIыныгъэ гъэ­нэфагъэхэр фэшIыгъэнхэмкIэ. Проект шъхьаIэхэр гъэцэкIагъэ зыхъу­хэ­кIэ, зекIоу республикэм къихьэрэри нахьыбэ хъущт. Непэ нафэу зэрэщытым­кIэ, зекIо къакIохэрэм япчъагъэ хэхъо, маршрут гъэшIэгъонхэр, зекIоным епхыгъэ псэуалъэхэр щыIэ хъугъэх. Анкара щыкIорэ къэгъэлъэгъоным хэлажьэхэрэми ахэм нэIуасэ зафашIын алъэкIыгъ. Республикэм ихьакIэщ бизнес илIыкIохэми игъоу алъэгъухэрэр Тыр­куем къынагъэсыгъэх: «Red Bridge», «Resort», «Hatti», «Псыгупс», «Благодать», «Мы­шъэ­къо». Iэнэ хъураеу щыIагъэм зэдызэшIуахыщт IофыгъохэмкIэ лъэныкъо гъэнэфагъэхэм ятегущыIэн хэлэжьагъэх Адыгеим илIыкIохэр, Тыркуем ихьакIэщ­хэм афэгъэзэгъэ Ассоциациер, зекIоным­кIэ Тыркуем иагентствэ­хэм я Ассоциацие ыкIи нэмыкIхэр. Адыгеим зекIонымкIэ иамалхэм нахь заушъомбгъунымкIэ ахэм фэIо-фашIэхэу афызэшIуахын алъэ­кIыщтхэри къыха­гъэщыгъэх.

Урысыем ишъолъырхэм тарихъ ыкIи чIыопс мэхьанэ зиIэ чIыпIэ гъэшIэгъонхэу яIэхэм афагъэхьыгъэу лъэныкъуабэ зэрагъэшIэн алъэкIынымкIэ стендым ишIуагъэ къэкIуагъ.
Адыгеим икIыгъэ лIыкIохэм Анкара и СатыушIыпIэ промышленнэ палатэ, Тырку Республикэм и Парламент зэIу­кIэгъу заулэ щадыряIагъ. Кавказ об­ществэхэм я Федерацие ыкIи Тыркуем икавказ бизнесменхэм я Ассоциацие ахэтхэр зэIукIэгъум хэлэжьагъэх. Адыге­имрэ Тыркуемрэ ясатыу-экономикэ зэ­фыщытыкIэхэм тапэкIи хэхъоныгъэ ашIыным пае сатыум, инвестициехэм ыкIи нэмыкI лъэныкъохэм япхыгъэ IофыгъохэмкIэ урысые-тырку куп гъэнэ­фа­гъэхэр зэхэгущыIэжьыгъэх. Ащ нэ­мыкIэу Урысые унэм ипащэу Александр Сотниченкэм зэрэригъэблэгъа­гъэхэм тетэу адыгэ культурэм ипчыхьэ шэ­кIогъум и 15-м щыIагъ. ЗэлъашIэрэ сурэтышIхэу республикэм исхэм яIоф­шIагъэхэм якъэ­гъэлъэгъон, купэу «Мыстым» иконцерт, дышъэидэнымкIэ Акъущэ Фатимэ имас­тер-класс еплъынхэ амал яIагъ.

ЗекIоным зыригъэушъомбгъузэ, Адыге­им амал зэфэшъхьафхэр егъэфедэх. Федеральнэ лъэгапIэм тетэу аштэрэ унашъохэри а IофшIэным хэплъэгъонхэу щытых, лъэпкъ проектэу «ЗекIонымрэ хьакIэхэм апэгъокIыгъэнымрэ» зыфи­Iорэм къыдилъытэрэ лъэныкъохэр ары ахэр зыфэкIожьхэрэр.
Шъугу къэтэгъэкIыжьы: 2024-рэ илъэ­сым къыщегъэжьагъэу дунэе зекIоным хэхъоныгъэ егъэшIыгъэнымкIэ Гупчэм урысые шъолъырхэр зэрепхых, лъэпкъ проектэу «ЗекIонымрэ хьакIэхэм апэгъокIыгъэнымрэ» зыфиIорэм тегъэпсы­хьагъэу ахэр гъэцэкIагъэ мэхъух.