Грант патриотическэ проектэу «ЛIыхъужъым исурэт» зыфиIорэм къыдыхэлъытагъэу Мыекъуапэ игурыт еджапIэу N 3-м зэIукIэ щыкIуагъ. Я 10-рэ класситIумэ арыс ныбжьыкIэ­хэр мыщ къырагъэблэгъагъэх.

«УФ-м и ЛIыхъужъ» зыфиIорэ щытхъу­цIэ лъапIэр къызфагъэшъошэгъэ ти­чIыгогъухэу зыпсэ зыгъэтIылъыгъэхэ Валерий Заволянскэм, Вадим Лемеш, Роман Тороховым, Олег Цоковым ыкIи мы гурыт еджапIэр къэзыухыгъэ щымыIэжь нэбгырищэу ЛIыхъужъныгъэм иорден къызэратыгъэхэм якъэбархэр ныбжьыкIэхэм къафаIотагъэх.
Грант патриотическэ проектэу «ЛIы­хъужъым исурэт» зыфиIорэм ныбжьыкIэ дзэ-патриотическэ зэхахьэу «ЗыкIыныгъэр» кIэщакIо фэхъугъ. Ащ иIэпыIэгъух фондэу «Хэгъэгум иухъумакIохэр» зыфиIорэм ишъолъыр къутамэрэ Адыгэ республикэ общественнэ организациеу «ХэушъхьафыкIыгъэ дзэ операцием иве­теранхэм я Ассоциациерэ».
Iофтхьабзэм ипшъэрылъыр хэушъхьафыкIыгъэ дзэ операцием илIыхъужъхэр, иветеранхэр ныбжьыкIэхэм арагъэ­шIэнхэр, джащ фэдэу, къыткIэхъухьэрэ лIэужхэр ахэм ящысэхэмкIэ яхэгъэгу фэшъыпкъэхэу, тарихъыр агъэлъапIэу пIугъэнхэр ары.
Проектым икомандэ хэтхэу хэушъхьа­фыкIыгъэ дзэ операцием хэкIодэгъэ дзэкIолIым янэу Наталья Штыковам, дзэ операцием хэлажьэхэрэм яшъхьэгъусэхэу Наталья Волковар ыкIи Светлана Тукаевам гъэшIэгъонэу, лIыхъужъхэм явидеосурэттехыгъэхэр агъэфедэхэзэ ахэм афэгъэхьыгъэ къэбархэр кIэлэ­еджакIохэм къафаIотагъэх.
ЛIыхъужъныгъэ зезыхьэзэ зыпсэ зы­гъэтIылъыгъэ тидзэкIолIхэм такъикърэ афэшъыгъуагъэх. Нэужым гущыIэр лъи­гъэкIотагъ Ассоциацием ипащэу, дзэ операцием хэлэжьагъэу, бгъэхалъхьэу «За отвагу» зыфиIорэр къызыфагъэшъо­шэгъэ Илья Донцовыр. Заом фэгъэ­хьыгъэ къэбар нэпцIхэм ныбжьыкIэхэр ямыдэIунхэм ар къыфэджагъ. Хэгъэгу зэошхом илъэхъан къыщегъэжьагъэу непэ къызнэсыгъэм тизэолIхэм лIыхъужъ­ныгъэу, лIыгъэу, пытагъэу зэрахьэрэр ащ къафиIотагъ. Хэгъэгур шIу алъэгъоу, ар къаухъумэу щытынхэм имэхьанэ зэрэиныр ветераным къыриIотыкIыгъ.
КIэлэеджакIохэм упчIабэ Илья Донцовым фагъэзагъ. Ахэр анахьэу зыфэгъэхьыгъагъэхэр ветераныр дзэ операцием хэлэжьэнэу зэрэхъугъэр, фронтым ижъотыпIэ мафэхэр зыфэдэхэр, чIыпIэ къинэу зэрыфэщтыгъэхэр, щыIэкIэ-псэу­кIэу щыряIэр, нэмыкIхэри. Къеблэгъэгъэ хьакIэм игуапэу ахэм джэуапхэр аритыжьыгъэх.
ХэушъхьафыкIыгъэ дзэ операцием хэтхэм яусэхэр ыкIи ятхыгъэхэр зэхэугъоягъэхэу зыдэхьэгъэхэ ятIонэрэ тхы­лъэу «Нет уз святее товарищества» зы­фиIорэм шъолъыр фондым ипащэ игуадзэу Джарымэ Еленэ къэзэрэугъои­гъэхэр нэIуасэ фишIыгъэх. ЗэолIхэр зыхэт плъыр-стырыр, къиныгъоу зэпа­чыхэрэр нэгум къыкIэуцохэзэ тхылъыр зэратхыгъэр, уеджэнкIэ зэрэгъэшIэгъоныр ащ къыхигъэщыгъ.
— НыбжьыкIэхэм зэпымыоу зэдэгущыIэгъухэр адэтшIынхэ ыкIи ЛIыхъужъхэм ящысэхэмкIэ тпIунхэм непэ мэхьанэшхо иI. Патриотизмэр янэшанэу, Хэгъэгум шIулъэгъу фыряIэу къыткIэхъу­хьэрэ лIэужхэр гъэсэгъэнхэр тишъэрылъ шъхьаI. Ары проектри зыфэгъэхьыгъэр, — хигъэунэфыкIыгъ фондым илIыкIо.
Iэшъынэ Сусан.