Гурыт еджапIэхэм хэхъоныгъэхэр ашIынхэм фэгъэхьыгъэ проектхэм ягъэхьазырын фы­тегъэпсыхьэгъэ зэнэкъокъур республикэм щаублагъ.

Ар тIоу гощыгъ. Апэрэр мы мафэхэм щыIагъ ыкIи зэнэ­къокъум ухэлэжьэным пае ищы­кIагъэхэр, лъэныкъоу анахь унаIэ зытебгъэтын фаехэр къа­фаIотагъэх.
АР-м финансхэмкIэ иминистрэ иапэрэ гуадзэу Екатерина Косиненкэр, АР-м гъэсэныгъэм­рэ шIэныгъэмрэкIэ иминистрэ игуадзэу Артем Журавель, кIэ­лэцIыкIухэм гъэсэныгъэ тедзэ зыщарагъэгъотырэ Гупчэм ипа­щэу Наталья Щербинар, АР-м методологиемкIэ ыкIи къэра­лыгъо финансхэр мониторинг шIыгъэнхэмкIэ отделым иуп­чIэжьэгъоу ПIатIэкъо Альбинэ, кIэлэегъаджэхэр, кIэлэ­еджакIохэр Iофтхьабзэм хэлэ­жьагъэх.
Бюджетированием фэгъэхьыгъэ проектым изэнэкъокъу рес­публикэм щырагъэкIокIы. Ар апэу зыщызэхащэщтыр Кощ­хьэблэ районыр ары. Мыщ ит гурыт еджэпIэ 13-мэ тхьамафэм къыкIоцI лъэныкъо зэфэшъхьаф­хэмкIэ проектхэр къагъэхьазырыщтых, шэкIогъум и 22-м ахэр къагъэлъэгъощтых. ТекIоныгъэ къыдэзыхырэ купищмэ респуб­ликэ ыкIи муниципалитет бюджетхэм къахэхыгъэ сомэ мин 350-рэ зырыз афатIупщыщт, япроектхэр щыIэныгъэм щы­пхыращыщтых.
КIэлэцIыкIухэр зычIэс гурыт еджапIэхэм хэхъоныгъэхэр ашIынхэмкIэ гухэлъэу яIэхэр къыраIотыкIынхэр, ахэр къагъэ­шъыпкъэжьын алъэкIэу гъэсэгъэнхэр ары пшъэрылъ шъхьаIэу зэхэщакIохэм зыфагъэуцужьырэр. ГущыIэм пае, кIэлэеджа­кIохэм зызыщагъэпсэфын, твор­чествэм зыщыхагъэхъон алъэ­кIыщт чIыпIэхэр зыфэдэн ылъэ­кIыщтхэм, еджапIэм ищагу зэтебгъэпсыхьаным ыкIи нэ­мыкI лъэныкъохэм афэгъэхьыгъэу ныб­жьыкIэхэм проект къа­гъэ­хьа­зырыщт, командэм сметэ зэхигъэуцощт. Проектым имэхьанэ, шIуагъэу пылъыр къызэ­рэраIо­тыкIырэм уасэ фа­шIыщт, анахь дэгъухэр къыха­хыщтых.

— Гурыт еджапIэхэм хэхъоныгъэ зэрашIыщт закъор арэп мы Iофтхьабзэм къыдыхэлъытагъэр. НыбжьыкIэхэр общест­веннэ щыIакIэм хэщагъэ хъунхэр, пшъэрылъ гъэнэфагъэхэр зыфагъэуцужьынхэм фэгъэсэгъэнхэр, ахэр къыраIотыкIы­жьы­шъуныр, щыIэныгъэм щыпхы­ращыжьыныр ары мыщ дэжьым анахь шъхьаIэр. Проектхэм ягъэ­хьазырынкIэ шIэныгъэу мыщ щызэжъугъэгъотыхэрэр нэужым къызфэжъугъэфедэжьынхэ шъу­лъэкIыщт. Чаныгъэ къызхэжъугъаф, шъуимурадхэр зэрифэ­шъуа­шэу къишъуIотыкIых, — къы­Iуагъ Артем Журавель кIэ­лэеджакIохэм закъыфи­гъазэзэ.
Кощхьэблэ районым игурыт еджапIэу N 2-м ипашэу Пы­щ­тыкъ Эммэ къызэриIуагъэмкIэ, зэнэкъокъум ягуапэу хэлажьэх ыкIи текIоныгъэ къыдахыным зэрифэшъуашэу зыфагъэхьа­зыры.
— Проектым игъэхьазырынкIэ анахьэу унаIэ зытебгъэтын фэе лъэныкъохэр къытфаIотагъэх. Ти­еджапIэкIэ кIэлэцIыкIу студие къыщызэIутхынэу тыфай, ары типроект зыфэгъэхьыгъэр. Ар тиIэ зыхъукIэ, творческэ зэнэ­къокъоу зэхатщэхэрэр нахьыбэ тшIыщтых, кIэлэеджакIохэм сэ­наущыгъэу ахэлъым зыкъызэ­Iуихыщт. ДжырэкIэ театральнэ кружок тиIэу дэгъоу мэлажьэ, ау ащ джыри зедгъэушъомбгъу­нэу, шъуашэхэр, Iэмэ-псымэхэр тщэфынхэу тыфай, — къыIуагъ Пыщтыкъ Эммэ.
ДЕЛЭКЪО Анет.