СамбэмкIэ дунаим гъо­гогъу 11-рэ ичемпионэу, Урысыем спортымкIэ имастерэу Хьасанэкъо Мурат ишIу­хьафтынхэр зэрылъ я VIII-рэ Урысые турнир Адыгеим щы­кIуагъ.

Республикэм ибэнакIохэм ащ чанэу зыкъыщагъэлъэгъуагъ, медаль 12 къахьыгъ.
— Хьасанэкъо Мурат спорт­смен цIэрыIу ыкIи зихэгъэгу шIу зылъэгъурэ цIыф. Мы зэнэкъо­къум ащ ыцIэ зэрихьырэм тырэгушхо. Тикъэралыгъо ипащэхэр самбэм хэхъоныгъэ ышIыным пылъых, сыда пIомэ, мы спорт лъэпкъым мэхьанэшхо раты, — къыIуагъ АР-м иминистрэхэм я Кабинет и Тхьаматэ игуадзэу Виктор Орловым.
Урысыем ишъолъыр зэфэ­шъхьафхэм къарыкIыгъэ спорт­смен 200-мэ заушэтыгъ, ахэм илъэс 15 — 17 аныбжь. БэнакIохэр апэрэ, ятIонэрэ ыкIи ящэнэрэ шъуашэ зиIэ дипломхэм афэбэнагъэх, джащ фэдэу текIоныгъэр къыдэзыхыгъэхэм ыкIи ахэм ятре­нерхэм ахъщэ шIухьафтынхэр афагъэшъошагъэх.
Адыгеим илIыкIохэу Батмэн Амин, Апыщ Ислъам ыкIи Бэгъ Салим текIоныгъэр къыдахыгъ. ЯтIо­нэрэ чIыпIэр къафагъэшъошагъ Хьакъуй Эльдаррэ Шъхьэфыжь Мусарэ. Ящэнэрэ хъугъэх Хьатхъохъу Дамир, Вазген Ва­рель­джан, Хъот Тамирлан, ­ХъорэлI Ис­лъам, Денис Фролкиныр, ЛIыхъу­кIэ Тахьир ыкIи Нэгор Ас­темир.
— Илъэси 10 сыныбжьэу самбэмкIэ зызгъэсэнэу езгъэжьагъ ыкIи дунаим ичемпион сыхъунэу сыфай, — къыIуагъ апэрэ шъуа­шэ зиIэ дипломыр къэзылэжьыгъэ Батмэн Амин.