Хабзэ зэрэхъугъэу, шэкIогъум и 17-м студентхэм я Дунэе мафэ хагъэунэфыкIыгъ. Адыгэ Республикэм ит колледжхэм, техникумхэм, апшъэрэ еджапIэхэм ныбжьыкIэ чанхэр ащеджэх. Тишъолъыр иобщественнэ, исоциальнэ-экономикэ щыIэныгъэ чанэу ахэлажьэх.

МэфэкIым ехъулIэу студентхэм ащыщ­хэм гущыIэгъу тафэхъугъ, ягъэхъагъэхэм тащагъэгъозагъ.
ХьакIэмыз Муслим Мыекъопэ къэралыгъо технологическэ университетым иящэнэрэ курс щеджэ. Студентыгъор шIогъэшIэгъонэу, лъэныкъо зэфэ­шъхьафхэм япхыгъэ Iофтхьабзэхэм нахьыбэу зэрахэлэжьэщтым зэрэпылъыр ащ къытиIуагъ. ИшIэныгъэхэм зэрахигъэ­хъощтым мафэ къэс дэлажьэ.
— ШIоигъоныгъэ уиIэмэ, апшъэ­рэ еджапIэм уиуахътэ гъэшIэгъо­нэу зэрэщыбгъэкIон плъэкIыщтыр апэрэ мафэм къыщегъэжьагъэу къызгурыIуагъ. ЭкономикэмкIэ ыкIи гъэIорышIэнымкIэ факультетым сыщеджэ, мы сэнэхьатымкIэ шIэныгъэ зэрэзэзгъэгъотырэм имызакъоу творчествэмкIэ, спортымкIэ ыкIи нэмыкI лъэныкъохэмкIэ Iоф­тхьабзэу апшъэрэ еджапIэм щызэхащэхэрэм сигуапэу сахэлажьэ. Мары бэмышIэу финанс шIэныгъэхэм япхыгъэ Iэнэ хъу­раем, джэгукIэхэм тишIэныгъэ­хэм ащыхэдгъэхъуагъ. Ащ нэмыкIэу проект­хэм язэхэгъэуцон сыгу рехьы, цIыф зэрымыс быбырэ аппаратым фэгъэхьыгъэу згъэхьазырыгъэр зэнэкъокъум есхьылIэн мурад сиI, — еIо тигущыIэгъу.
Университетым Дзэ егъэджэн гупчэ къызэрэщызэIуахыгъэр зызэхехым, Муслим емыджэнджэшэу ащ чIэхьагъ, сыда пIомэ еджэным ыуж дзэм къулыкъу щыпхьыжьын ищыкIагъэп, сэнэхьат шъхьаIэр зэрэзэригъэгъотырэм имыза­къоу дзэ билет иIэу еджэныр къыухыщт. Егъэджэн гъэшIэгъонхэр зэрафызэхащэхэрэр кIэлэ ныбжьыкIэм къытфиIо­тагъ, анахьэу дронхэм ягъэзекIон ыкIи яшIын зэрэшIогъэшIэгъоныр къыIуагъ. ИцIыкIугъом къыщегъэжьагъэу компьютерым фэщагъэу щыт, ащ хэшIыкI зэрэфыриIэм ишIуагъэкIэ еджэнри псынкIэ къыфэхъу. Дзэ егъэджэн гупчэм компьютерым кIэрысэу дроныр ыгъэзекIонэу щызэригъэшIагъ, дрон шъыпкъэхэмкIи практическэ IофшIэнхэр акIунхэу аублэ.
ХьакIэмыз Муслим ицIыкIугъом къы­щегъэжьагъэу еджэныр икIас, усэхэр етхых. Щысэ зытырихынхэри иIэх, ятэжъэу Бэгъ Нурбый республикэм итхэкIо цIэрыIу, янэу ХьакIэмыз Сусанэ АР-м изаслуженнэ журналист, КъТРК-у «Адыгеим» радиомкIэ икъулыкъу ипащ.
— ТхылъхэмкIэ клубэу тиапшъэ­рэ еджапIэ хэтым сигуапэу сыкIощтыгъ, литературэм сищыIэныгъэ чIыпIэ гъэнэфагъэ щеубыты. Усэхэр стхынхэу сикIас, гурыт еджапIэм пэублэ классхэм къащегъэжьагъэу литературнэ зэнэкъокъу­хэм сахэлажьэщтыгъ, текIоныгъэ къащыдэсхыщтыгъ. Усэхэр сыгу къы­сиIозэ сэтхых, телеграм-­канал сиIэу анахь сыгу рихьыхэрэр къисэгъахьэх, — еIо кIэлэ ныбжьыкIэм.
ХьакIэмыз Муслим иныбжьыкIэгъур гъэшIэгъонэу, шIуагъэ къытэу егъакIо, игъэхъагъэхэм ахигъэхъон мурад иI.