Хьагъур Аминэ Адыгэ къэралыгъо университетым хьисапымкIэ ыкIи компьютер шIэныгъэхэмкIэ ифакультет ияплIэнэрэ курс щеджэ. ИцIыкIугъом къыщегъэжьагъэу хьисапыр икIас, ышнахьыжъэу мы факультетым щеджагъэм кIырыплъи, ежьыми мы гъогур къыхихыгъ.

— Непэрэ мафэм устудентыныр гъэшIэгъоны, еджэн закъоп уишIэныгъэхэм зэрахэбгъэхъон плъэкIыщтыр. Мафэ къэс кIэ горэ зэхэтэхы, тэлъэгъу. Игъэ­кIотыгъэу хьисапымкIэ ыкIи информатикэмкIэ шIэныгъэхэр зэрэзэзгъэгъотыхэрэм имыза­къоу волонтер IофшIэными сишъыпкъэу сыпылъ. Университетым сызычIэхьагъэм къыщегъэжьагъэу апшъэрэ еджапIэм ипрофсоюз организацие сыхэ­хьагъ ыкIи пащэм игодзэ IэнатIэр къысфагъэшъошагъ. ПшъэдэкIыжь ин сиIэу сэлъытэ, сипшъэрылъхэр зэрифэшъуашэу зэрызгъэцэкIэщтым ыуж сит, — еIо Аминэ.
Профсоюзым лъэныкъо зэфэшъхьафхэмкIэ Iоф зэришIэрэр нэужым пшъэшъэжъыем къыIотагъ. Апшъэрэ еджапIэм щеджэрэм ипроцент 75-р ащ хэт. Студентхэм яфитыныгъэхэр профсоюзым къеухъумэх, щыIэныгъэм чIыпIэ къин ригъэуцуагъэхэм IэпыIэгъу афэхъу. Ащ дакIоу студентхэм Iоф­тхьэбзэ зэфэшъхьафхэр афызэхащэх ыкIи ахэм ахэлэжьэнхэмкIэ IэпыIэгъу афэхъух. БэмышIэу «Школа правовой грамотности» зыфиIорэр зэхащагъ, Къыблэ федеральнэ шъолъырым ичIыпIэ зэфэшъхьафхэм къарыкIыгъэ ныбжьыкIэхэр ащ хэлэжьагъэх. Мы мафэхэм пшъэшъэжъыер Ростов-на-­Дону щырагъэкIокIырэ форумым хэлажьэ.
Аминэ лъэныкъо зэфэшъхьахэмкIэ гъэхъэгъэшIухэр иIэх, ахэм ащыщ «Студенческий лидер-2024» зыфиIорэ Урысые зэнэкъокъум ишъолъыр уцугъо текIоныгъэ къызэрэщыдихыгъэр. Краснодар щыкIогъэ къыкIэлъыкIорэ едзыгъоми зэрифэшъуашэу зыкъыщигъэлъэ­гъуагъ.
Хьагъур Аминэ апшъэрэ еджапIэм ыцIэкIэ гурыт еджапIэхэм, гурыт сэнэхьат зыщызэрагъэгъотырэ еджапIэхэм ренэу макIо ыкIи ныбжьыкIэхэм гущыIэгъу афэхъу зыхъукIэ, апэкIэ гъэшIэгъоныбэ зэрилъыр, еджэн за­къоу щымытэу щыIэныгъэм къащыфэфедэжьыщт лъэныкъохэмкIэ гъэсагъэ зэрэхъущтхэр ареIо. ШIоигъоныгъэ уиIэмэ, узыфаер зэкIэ къызэрэбдэхъущ­тыр кIэухым пшъэшъэжъыем къыхигъэщыгъ.
НэкIубгъор зыгъэхьазырыгъэр Делэкъо Анет.