Налщык тызэрэщылэжьэщт программэм сызыхэплъэм, lофшlэгъу дэкlыгъо тхьамафэр зэрэгъэшlэгъоныщтым седжэнджэшыщтыгъэп. Ау ащ сигугъэхэр къыгъэшъыпкъэжьыгъэхэ къодыеп, ашъхьэдэкlыгъ. Тызlукlэгъэ нэбгырэ пэпчъ ищыкlагъэу щытыгъ, гум хэпкlагъ, сишlэжь лъэуж пхырищыгъ. Лъэпкъ журналистикэм илэжьэкlошхоу Хьашlуцlэ Мухьамэд, чlым тет адыгэхэр зэфэзыщэхэрэ Дунэе Адыгэ Хасэм ипащэу Сэхъурэкъо Хьаути, хэкупсэу, илъэпкъ фэлэжьэн нэмыкlырэ хъопсапlэ зимыlэу lутlыжъ Мэджыд, адыгэ лъэпкъым, бзылъфыгъэм ыцlэ дахэкlэ рязыгъэ­lогъэ Пекъу Алинэ, иорэдхэмкlэ тидахэ зыlуатэу, къедэlухэрэр ымакъэкlэ зыумэхърэ Хьакъул Оксан, тикультурэ зыlуатэу, тишхыныгъохэр зыгъэлъэгъохэрэ Къэрдэн Хьэсан, Озрэкъо Чэрим, адыгэм имафэ зытхыхэрэ журналистхэу «Адыгэ псалъэм» иlофышlэхэр — пстэури зэфэшъхьафых. Ау ялъэпкъ зэрэ­фэлажьэхэрэм, неущ иlэным зэрэфэгумэкlхэрэм
ыкlи ащ емызэщыжьхэу зэрэдэлажьэхэрэм ахэр ­зэфегъадэх. Шъхьадж зыфэгъэзагъэм елъытыгъэу, адыгэ лъэпкъым игъашlэ лъегъэкlуатэ, иlофыгъохэм адэлажьэ, ишlуагъэ регъэкlы. Ары тиlофшlэн илъэныкъошlур — мафэ къэс ащ фэдэ нэбгыракlэхэм тарещалlэ, нэlуасэ тафешlы, тигъэзет сатырхэмкlэ ахэр цlыфхэм ятэгъашlэх.
Мыщ фэдэ журналист зэдэлэжьэныгъэр къош ­шъолъырхэм ялъэпкъ гъэзетхэм язэдэлэжьэныгъэ ихьатыр. Нахьыжъхэм рахьыжьэгъэ lофыр хэнагъэ амышlэу, ары пакlошъ, хахъо иlэу непэрэ редактор шъхьаlэхэу Мэщлlэкъо Саидэ («Адыгэ макъэр»), Абидэкъо Люсанэ («Черкес хэкур») ыкlи Жыласэ Заурбэч («Адыгэ псалъэр») лъагъэкlуатэ. Ащ ишlуагъэкlэ тэ, журналистхэм, тшъхьэкlэ тлъэгъугъэр ­ттхыжьын амал дгъотырэ къодыеп, зэпэблагъэ, зэныбджэгъу тешlы, гъунапкъэхэр lуегъэкlотых, тигущыlакlэ зэфэмыдэми, гу лъытымытэу, тызэгурыlо тэхъу.
Налщык щызгъэкlогъэ тхьамафэм зэфэхьысыжьэу сигъэшlыгъэр бэ, ау анахь шъхьаlэр — адыгэм неущырэ мафэ иl, къытхэтых ащ фэгуlэхэрэр, кlуачlэ хэзылъхьэхэрэр, игъашlэ фэзыгъэлажьэхэрэр: гущыlэкlэ, шlагъэкlэ, искусствэмкlэ. Ау ащ къыфэблэщтыр нахьыб жъугъэу узэlукlэмэ, зым адырэр зэхихымэ, зэхэхьаныр хэбзэ дахэ зыфэтшlымэ. Сыд фэдизэу технологиякlэхэр непэрэ щыlэныгъэм щыпэрытхэми, цlыфым игущыlэрэ ащ ынэ укlаплъэзэ удэгущыlэщтымрэ ахэр атекlощтхэп. Тизэхахьэ нахьыбэ орэхъу!