Адыгеим и ЛIышъхьэу КъумпIыл Мурат Адыгэ Республикэм псауныгъэр къэухъумэгъэнымкIэ икъэралыгъо бюджет учреждениеу «Адыгэ республикэ клиникэ сымэджэщым» иотделениехэм япащэхэм зэIукIэгъоу адыриIагъэм пэрыт технологиехэр нахьышIоу зэрагъэфедэщт шIыкIэм щытегущыIагъэх.

Адыгэ Республикэм иминистрэхэм я Кабинет и Тхьаматэ игуадзэу Виктор Орловыр, АР-м псауныгъэр къэухъумэгъэнымкIэ иминистрэу Мэрэтыкъо Рус­тем ащ хэлэжьагъэх.
Урысые Федерацием и Президентэу Владимир Путиным къыгъэнэфэгъэ пшъэрылъ шъхьаIэхэм зыкIэ ащыщхэм ягъэцэкIэнкIэ – цIыфхэм япсауныгъэ зыкъегъэIэтыгъэнымкIэ, ахэм нахьыбэу къагъэшIэнымкIэ республикэм Iофтхьэбзэ зэфэшъхьафхэр зэрэщызэрахьэхэрэр Адыгеим и ЛIышъхьэ къыхигъэщыгъ. Ахэм язэшIохынкIэ пэрыт технологиехэр нахь игъэкIотыгъэу гъэфедэгъэнхэм мэхьанэшхо иI. Республикэм ихэбзэ къулыкъухэм лъэпкъ проектэу «Псауныгъэм икъэухъумэн» зыфиIорэм, къэралыгъо программэхэм къыдалъытэрэ амал зэфэшъхьафхэр къызфагъэфедэх. Медицинэм щылажьэхэрэм Iоф ашIэнымкIэ, сымаджэхэм яIэзэгъэнымкIэ ищыкIэгъэ амалхэр республикэм щарагъэгъотых, джырэ уахътэм диштэрэ оборудованиер къащэфы, пэрыт технологиехэр нахьыбэу къызфагъэфедэх. 2018-рэ илъэсым къы­щегъэжьагъэу сымэджэщи 4, IэзэпIи 5, фельдшер-мамыку IэзэпIэ 33-рэ, амбулатории 3 Адыгеим щагъэпсыгъ. Мыгъэ амбулатории 5-мэ яшIын ыуж итых. Медицинэ IэпыIэгъу псынкIэ языгъэгъо­тырэ къулыкъум иавтомобильхэр зэкIэ зэблахъугъэх

«Мы лъэныкъомкIэ гъэхъагъэу тиIэхэр нэрылъэгъух. Аужырэ илъэси 5-м пэрыт технологиехэм ателъытэгъэ медицинэ IэпыIэгъу лъэпкъыкIэ 60-м ехъу агъэфедэ хъугъэ. Адыгэ республикэ клиникэ сымэджэщым иIофышIэхэм яIахьышхо ащ хашIыхьэ. Республикэм ипэрыт учреждениехэу уахътэм диштэрэ медицинэ IэпыIэгъу язытыхэрэм ар зэу ащыщ. 2020-рэ илъэсым къыщегъэжьагъэу АРКБ-м лъэныкъо зэфэшъхьафхэмкIэ IэпыIэгъоу аригъэгъотырэр процент 51,4-кIэ нахьыбэ хъугъэ. Ащ къыгъэлъагъорэр узхэм ягъэунэфынкIэ ыкIи сымаджэхэм яIэзэгъэнымкIэ IэпыIэгъоу аратырэр нахьышIу зэрэхъугъэм имызакъоу, шъо­лъырым исхэм республикэм къыщяIэзэнхэр нахь къызэрэхахырэри ары», — къыIуагъ КъумпIыл Мурат.
ЦIыфхэм узхэр къямыутэлIэнхэм, пэрыт технологиехэм ягъэфедэн зегъэ­ушъомбгъугъэным япхыгъэ Iофыгъохэм зэIукIэгъум шъхьафэу анаIэ щатырагъэ­тыгъ. Адыгэ Республикэм псауныгъэр къэухъумэгъэнымкIэ икъэралыгъо бюджет учреждениеу «Адыгэ республикэ клиникэ сымэджэщым» иврач шъхьаIэу Чэужъ Нателлэ къызэриIуагъэмкIэ, урологием процент 30,3-кIэ, гу-лъынтфэ хирургием процент 22,4-кIэ, нейрохирургием процент 16,1-кIэ пэрыт технологиехэр ащагъэфедэх.
Пэрыт технологиехэр зыщыгъэфедэгъэ медицинэ IэпыIэгъур нахьышIоу зэхэщэгъэн зэрэфаем АР-м и ЛIышъхьэ анаIэ тыраригъэдзагъ, медицинэ IэпыIэгъу зыщарагъэгъотырэ лъэныкъо пстэуми язэдэлэжьэныгъэ ащагъэлъэшынэу пшъэрылъ афишIыгъ. Джащ фэдэу хэушъхьафыкIыгъэ дзэ операцием хэлажьэхэрэмрэ иветеранхэмрэ IэпыIэгъу зэрафэхъухэрэми гъунэ лъафынэу унашъо афишIыгъ.
АР-м и ЛIышъхьэ ипресс-къулыкъу къытыгъэ къэбархэмкIэ
ЛIышэ Саныет.