УФ-м и Президентэу Владимир Путиныр кIэщакIо зыфэхъугъэ программэу гъэстыныпхъэ шхъуантIэр зимыIэхэм аIэкIэгъэхьэгъэным фэгъэхьыгъэм къыдыхэлъытагъэу Адыгеим Мыекъопэ районымкIэ истаницэу ХъымыщкIэй дэт фельдшер-мамыку IэзапIэм гъэстыныпхъэ шхъуантIэр джырэблагъэ фатIупщыгъ.

Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром газораспределение Майкоп» зыфиIорэм ипащэу ЕкъутэкI Аслъан, Парламентым идепутатхэу Олег Картамышевыр, Александр Колесниковыр, Алла Чернышовар, район ыкIи псэупIэ кой администрациехэм ялIыкIохэр.
Медицинэм иучреждениеу нэбгырэ мин фэдизмэ яфэIо-фашIэхэр зыгъэцакIэрэм гъэстыныпхъэ шхъуантIэр IэкIэхьаным фэшI газрыкIопIэ метрэ 38-рэ агъэпсыгъ, хьакоу фабэр къэзытыщтыр, гъэстыныпхъэу агъэфедагъэр зыфэдизыр къэзылъытэщт счетчикыр ыкIи унэ кIоцIым газым ымэ итымэ зыгъэунэфыщт системэр агъэуцугъэх.
— Фельдшер-мамыку IэзапIэр социальнэ мэхьанэшхо зиIэ псэуалъ. Арышъ, ащ гъэстыныпхъэ шхъуантIэр зэрэращэ­лIагъэр ыкIи непэ зэрэфатIупщырэр хъугъэ-шIэгъэ ин. Президентыр кIэщакIо зыфэхъугъэ программэу «социальнэ догазификацием» ар къыдыхэлъытагъ. Ащ ишIуагъэкIэ унагъохэм ямызакъоу, гъэсэныгъэм, медицинэм яучреждениеу газыр зимыIагъэхэм аIэкIахьэ хъугъэ. Къоджэ псэупIэхэм зыпкъ итэу хэхъоныгъэхэр ашIынхэм фытегъэпсыхьэгъэ IофшIэнхэм ар зэу ащыщ, — къыIуагъ Владимир Нарожнэм.
Мы мэфэ дэдэм станицэу Дахъом дэт хьакIэщхэм ащыщ гъэстыныпхъэ шхъуантIэр фатIупщыгъ. ГъэпсэфыпIэм газыр IэкIэхьаным пае давление ин зиIэ кIуапIэу метри 123-рэ, давление цIыкIу зиIэу метрэ 230-рэ чIышъхьашъом щагъэпсыгъ, метрэ 458-рэ чIы чIэгъымкIэ ащагъ, фабэр къэзытыщт хьаку 14, унэ кIоцIым газым ымэ итымэ зыгъэунэ­фыщт системэу 8 агъэуцугъ.
ХьакIэщым газыр екIуалIэмэ, зызгъэ­псэфынэу къакIохэрэм яфэIо-фашIэхэр джыри нахьышIоу гъэцэкIагъэ зэрэхъущт­хэр, зекIоным изегъэушъомбгъункIи ащ мэхьанэ зэриIэр Iофтхьабзэм хэлажьэхэрэм къыхагъэщыгъ.