Участковэ уполномоченнэм иIофшIэн зыфэдэм зыщыдгъэгъуазэмэ тшIоигъоу Мыекъуапэ иучасткэу
N 13-м истаршэ участковэу Рустам Абдурахмановым тыригъусэу зы IофшIэгъу мафэ дэдгъэкIуагъ.

Пхъэ унэжъ цIыкIухэр, ешъуакIохэр зыщызэрэугъоихэрэ ыкIи бзэджэшIэ чIыпIэхэр. ЗэгурыIоныгъэ зэрымылъ унагъохэр, хьапсым бэмышIэу къы­чIэкIыжьыгъэхэр. Зэхэфынхэр, зэIахьылхэм, зэгъунэгъухэм азыфагу илъ бырсырыр, жъалымыгъэ хэлъэу сабыйхэм адэзекIуагъэхэр. Тыгъугъэ ыкIи хъункIэгъэ бзэджэшIагъэ зезыхьагъэхэр, наркотикхэм ыкIи шъон пытэхэм апыщагъэхэр… Мы хъугъэ-шIагъэу къэспчъыгъэхэр тэркIэ щынагъоу къэIух. Ау мыхэр участковэхэр мафэ къэс зэолIэхэрэ IофшIэн къызэрыкIу.
АР-м ихэбзэухъумэкIо къулыкъухэм Рустам захэтыр илъэси 6 хъугъэ. Ятэу Вадим, отставкэм щыIэ офицер, илъагъо рыкIо шIоигъоу 2013-рэ илъэсым Урысыем и МВД иуниверситет икъутамэу Краснодар дэтым чIахьи, илъэситфэ щеджагъ. Ар къызеухым, 2018-рэ илъэ­сым Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэм иучастковэ уполномоченнэу Iоф­шIэныр ригъэжьагъ. 2022-рэ илъэсым къыщыублагъэу старшэ участковэ уполномоченнэу ищытхъу аригъаIозэ Iоф ешIэ.
Рустам иIофшIэн зэрэмыпсынкIэр къыгурэIоми, ар шIу елъэгъу. Ащ фэдэхэм апае «ИIофшIэн Тхьэм къыфигъэхъугъ» аIо.
Мафэ къэс а зы шапхъэм тетхэу участковэ уполномоченнэхэм IофшIэныр аублэ. Рустам пчэдыжьым жьэу Мые­къуапэ идежурнэ часть екIуалIи, Iашэр къыратыгъ. Нэужым сыхьатыр 9-м пчэдыжь зэхэсыгъоу пащэм афызэхища­гъэм кIуагъэ. Шъхьадж зэпхыгъэ участкэм елъытыгъэу чэщ-зымафэм къыкIоцI хъугъэ-шIагъэу къаIэкIэхьагъэхэр зэрыт материалыр участковэм къыратыгъ. Ащ ыуж район цIыкIоу ЦКЗ-м иIофшIапIэу щыIэм ыгъэзэжьи, мафэм Iоф зыдишIэн фаехэм защигъэгъозэнэу ыублагъ. Нэужым ахэр иIэубытыпIэу псэупIэхэр къыкIухьанхэу ригъэжьагъ, гумэкIыгъоу яIэхэр зэрэдигъэзыжьыщтым пылъэу унагъохэм аIухьэзэ адэгущыIагъ, пэшIорыгъэшъ Iофтхьабзэхэр адызэрихьагъ. Дао къэзытыгъэхэм яIофхэм язэхэфын мэфэ реным ыуж итыгъ. АхэмкIэ унэшъо гъэнэфагъэхэр ышIыгъэх. ИIофшIэн уахътэ пчыхьэм сыхьатыр 7-м ыухынэу щыт нахь мышIэми, унэм кIожьыным ар дэгуIэрэп, сыда пIомэ IофшIапIэм щыIэхэу, мафэм унэм имысыгъэхэм адэжь пчыхьэм кIон фаеу мэхъу.

Р. Абдурахмановым къызэриIуагъэмкIэ, зэпхыгъэ участкэм нэбгырэ мини 5-м ехъу къыхеубытэ. Хьапс зытемылъ нэбгыри 7-р пэшIорыгъэшъ учетым щытых. Мазэр пштэмэ, гурытымкIэ Iоф 70—80 фэдиз зэхефы.
Сыхьатыр 3-м нэс материалэу къы­IэкIэхьагъэхэм Рустам защигъэгъозагъ, ахэмкIэ протоколхэр зэхигъэуцуагъэх. Нэужым участковэм тыригъусэу дао къэзытыгъэхэм ащыщэу илъэс 73-рэ зыныбжь Людмила Богатыревам дэжь тыкIуагъ.
Ащ къызэриIотагъэмкIэ, исотовэ телефон дэлъ сим-картэу «Мегафоным» епхыгъэм ежь бзылъфыгъэм ишIэ хэмылъэу ахъщэ тIогъогогъо рахыгъ. Тхьамафэм къыкIоцI бзылъфыгъэм ымышIэрэ номерымкIэ къыфытеуагъэх ыкIи СМС-мэкъэгъэIу къыфагъэхьыгъ. ЧIыфэ зэрэтелъым пае ахъщэ ителефон рагъэкIэу ащ къыраIощтыгъ. Ау бзы­лъфыгъэм зыпари чIыфэ телъэп. Мегафоным иоператор зызыфегъазэм, зэзэгъыныгъэу адишIыгъэр къызэтырагъэуцонэу къараIуагъ ыкIи аущтэу зекIуагъэ. Арэу щытми, ятIонэрэ мафэм пчыхьэм етIани СМС къыфэкIуагъ, джащыгъуми чIыфэ телъэу ахъщэр хагъэкIыгъэу итхэгъагъ. Ащ ыуж етIани зы мафэ блэкIыгъэу джыри нэмыкI номер тетхагъэу къычIэкIыгъ. Джащыгъум къыгурыIуагъ ипаспорт пылъ номерхэр бзэджашIэхэм зэраIэкIэхьагъэр. Арыти, полицием зыфигъэзагъ. ПсынкIэ Iофэу къулыкъу­шIэхэм даом анаIэ тырадзагъ, ахэм афэраз.
Рустам бзылъфыгъэм риIуагъ «Мегафоным» иоператор зыфигъэзэнышъ, къэбар шъыпкъэр зэригъэшIэнэу, ащ ыуж джэуапыр къылъигъэIэсыжьынэу ар ыгъэгугъагъ. БзэджашIэхэм цIыфэу агъап­цIэхэрэм япчъагъэ мафэ къэс зэрэхахъорэр ащ фиIотагъ, ащкIэ сакъы­ныгъэ къызхигъэфэнэу еушъыигъ. Ащ нэмыкIэу гъэпцIакIохэм цIыфхэр амыгъэделэнхэм фэшI узыгъэгъозэрэ тхьапэу къыхаутыгъэр Людмила Богатыревам ритыгъ.
— Илъэсихэу Iоф зысшIэрэм къы­кIоцI бэ хъугъэ-шIагъэу сызэрихьылIагъэр, — еIо Рустам. – ГущыIэм пае, гъунэгъухэм зыкъытфагъэзагъ шъхьэзакъоу псэурэ ныор бэшIагъэу зэрамылъэгъугъэм къыхэкIэу. Ныом Iахьылхэр иIагъэ­хэп, ипчъэ егъэтыгъагъ, фытеохэми къафыIуихыщтыгъэп. МЧС-м икъулыкъу­шIэхэр тигъусэу унапчъэр хэттхъыгъ. Ныор лIагъэу къычIэкIыгъ. Нэужым зэрагъэунэфыгъэмкIэ, тхьамафэ фэдизрэ ащ ыпсэ хэкIыгъэу унэм илъыгъ. Гукъау нахь мышIэми, мыщ фэдэ хъугъэ-шIагъэхэм бэрэ тарехьылIэ. Тиучасткэ къыхиубытэ хъумэ, следовательхэм таригъусэу чэщи, мафи тимыIэу хъугъэ-­шIагъэ пэпчъ тэкIо, тиIэпыIэгъу ятэгъэ­кIы.
Рустам зэхифын фэе материалэу къыIэкIэхьагъэхэм ащыщ илъэс 30 зыныбжь Александр Соколовым Адыгэ республикэ наркологие диспансерым ежь ишIоигъоныгъэ хэлъэу зызэрэщигъэ­хъужьырэм фэгъэхьыгъэр. Ащ икъэбар зыщигъэгъуазэ шIоигъоу сымэджэщым тыкIуагъ.
КIалэм тыкъызелъэгъум, зи химыIухьэу, ау ынэгукIэ тIэкIу зэрэгумэкIырэр къыхэщэу къытпэгъокIыгъ. Урамым тетэу нэмыкI чIыпIэм ущыIукIагъэ­мэ, егъашIэм наркоманэу уегупшысэщ­тэп. ИтеплъэкIэ кIэлэ зэIэкIэлъ, лъэпэ лъаг, участковэм упчIэу ритыхэрэм IупкIэу джэуапхэр къаретыжьы.
— БэшIагъа наркотикхэм уапыщагъэ зыхъугъэр?
— Ары.
— Сыдигъо щегъэжьагъа?
— КъызэрэсшIэжьырэмкIэ, 2020-рэ илъэсым апэрэу сыуплъэкIугъ.
— Iоф ошIа?
— Мы уахътэм сылажьэрэп.
— Наркотикхэр тыдэ къипхыхэра?
— Краснодар щыщ синэIосэ кIалэм къысетых.
— Наркотикэу бгъэфедэхэрэр сыд фэдэха?
— «Гашиш», «ЛСД», «Соль» зыфэпIощтхэр ары.
Александр къызэриIотагъэмкIэ, мыгъэ яплIэнэрэу наркологие диспансерым къеуалIэ, 2020-рэ илъэсым къыщыублагъэу учетым хэт.
ШэкIогъум и 10-м къыщегъэжьагъэу IэзапIэм зыщегъэхъужьы. КъызэреIазэхэрэм ишIуагъэ къекIымэ тызеупчIым, мары къытиIуагъэр: «Ары, пчъагъэрэ сищыIэныгъэ къагъэнэжьыгъ, сылIэнэу щытэу чIыпIэ пчъагъэмэ сарыфагъ, ау сакъыращыжьыгъ».
Нэужым Рустам кIалэр щигъэгъозагъ наркотикхэр къызэрэригъэкIокIыхэрэм, зэригъэфедэхэрэм афэшI административнэ пшъэдэкIыжь рагъэхьын зэралъэ­кIыщтыр. Зигъэхъужьынэу ыкIи тапэкIэ сымэджэщым къычIэмыфэжьынэу участковэр кIалэм еушъыигъ.
— IофшIэныр къин къыпщыхъурэба?, — сеупчIы участковэ ныбжьыкIэм.
— Шъыпкъэр пIощтмэ, участковэ уполномоченнэу Iоф пшIэныр псынкIэп. Ар бэмэ афэмыукIочIэу IокIыжьых е нэмыкI IофшIапIэхэм мэкIожьых. АпэрапшIэ IофшIэным угу фэщэгъэн, ар шIу плъэгъун фае. Армырмэ, Iоф рыпшIэшъущтэп. Мы структурэм сыхэтэу Iоф зысшIэрэр илъэси 6 хъугъэшъ, сырыраз, — къытыжьыгъ ащ джэуап.
Ащ къызэриIуагъэмкIэ, участковэр IофшIэным фэкъулаеу, щэIагъэ хэлъэу, IофшIэныр шIу ылъэгъоу щытын, ыгу зэIухыгъэу цIыфхэм ахэтын, жабзэ къа­фигъотын, законыр ышIэн, цIыфхэм къаIорэм уядэIушъун ыкIи ягумэкIыгъохэр зэхишIэн фае. Сыда пIомэ нахьыбэм икъоу юридическэ шIэныгъэ яIэп. Ащ къыхэкIэу ягупшысэхэр тэрэзэу къыраIотыкIын алъэкIырэп. Ахэм даохэр тэрэзэу зэхагъэуцонымкIэ IэпыIэгъу афэхъу.
Участковэу Iоф пшIэныр псынкIэ Iофэу зэрэщымытыр ыкIи лъэныкъо зэфэ­шъхьафхэмкIэ икъоу шIэныгъэ зэрэуиIэн фаер къыгурыIозэ иIофшIэн лъегъэкIуатэ Р. Абдурахмановым.
ТапэкIэ гухэлъэу иIэхэм ащыщ ипшъэ­рылъхэр зэрифэшъуашэу ыгъэцэкIэнхэу, иIофшIэнкIэ лъэгэпIэ инхэм анэсынэу.
КIАРЭ Фатим.
Сурэтхэр авторым иех.