«Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым къыдыхэлъытагъэу Мыекъуапэрэ къэлэ гъэпсыкIэ зиIэ поселкэу Яблоновскэмрэ ягъогу инфраструктурэ игъэкIэжьын пIалъэхэм апэ итхэу зэшIуахых.

Мыекъопэ къэлэ администрацием къызэрэщаIуагъэмкIэ, муниципальнэ гъогу Iахьи 4 шапхъэхэм адиштэу зэтырагъэпсыхьажьыгъ. Ар пстэумкIи километри 5 мэхъу. Урамэу Шоссейнэм щыщэу Железнодорожнэмрэ 7-й Переулок зыцIэмрэ азыфагу, Советскэм щыщ Iахьэу Лениным ыцIэ зыхьырэмрэ Прямоимрэ азыфагу, урамэу Крестьянскэм иIахьэу Титовым ыцIэ зыхьырэмрэ Победэмрэ азыфагу, Курганнэм иIахьэу Лениным ыкIи Шэуджэным ацIэ зыхьыхэрэм азыфагу зигугъу къашIы­гъэр. IофшIэнхэм зэкIэмкIи сомэ миллион 209-рэ апэIухьагъ.
Адыгеим икъэлэ шъхьаIэ игъогухэм ягъэцэкIэжьын ащ щаухырэп. КъэкIощт 2025-рэ илъэсымкIэ пшъэрылъхэм ахагъэуцогъэгъэ гъогу Iахьи 3 мыгъэ зэтырагъэпсыхьажьыгъ. Километри 2 пстэумкIи ар мэхъу. Зыр Гагариным ыцIэ зыхьырэ урамым иIахьэу Пушкиным ыцIэкIэ щытымрэ Пионерскэмрэ азыфагу илъыр ары. ЯтIонэрэ Iахьыр урамэу Юбилейнэм хэхьэ, Луговоимрэ Герценымрэ ацIэ зыхьыхэрэм азыфагу къыреубытэ. Ящэнэрэр 2-ая Крестьянская зыфиIорэм щыщ, урамэу Кооперативнэм щырегъажьэ, Адыгэ къэралыгъо университетым иколледж нэсы. Ахэм ащызэшIуахыгъэ IофшIэнхэм сомэ миллиони 113-рэ атефагъ.
Яблоновскэ псэупIэ кой администрацием къызэрэщаIуагъэмкIэ, лъэпкъ проектым къыдыхэлъытагъэу чIыпIи 4-мэ гъогухэр ащагъэцэкIэжьыгъэх. Ахэр поселкэм иурамхэу Коммунаровым, Карл Маркс ыцIэ зыхьырэм ыкIи Центральнэм яIахьых ыкIи псэупIэ коим хэхьэрэ поселкэу Новый зыфиIорэм иурамэу Строительнэм щыщ Iахь. Сомэ миллион 250-рэ ахэм апэIухьагъ.
Мы уахътэм Яблоновскэм иурамэу Промышленнэм щыщ Iахь, унэу N 18-м щегъэжьагъэу Теуцожьым ыцIэ зыхьырэм нэсэу, агъэкIэжьы. Мыщ щызэшIуахырэ IофшIэнхэри къэкIорэ илъэсым агъэнэфэгъагъэхэм ащыщых.
Гъогухэм ягъэкIэжьын фытегъэпсыхьагъэу зэшIуахыхэрэр транспортым иинфраструктурэ зиушъомбгъуным имыза­къоу, цIыфхэм ящыIакIэ нахьышIу хъунми зэрэфэIорышIэхэрэр теубытагъэ хэлъэу къэпIон плъэкIыщт.