ЕшIэгъуитIу иIагъ
БаскетболымкIэ Урысыем ичемпионат иапшъэрэ лигэ щешIэрэ «Динамо-МГТУ-м» Мыекъуапэ зэIукIэгъуитIу щыриIагъ. Къалэу Брянскэ икомандэу «Десна» тихьэкIагъ.
Апэрэ ешIэгъум тикомандэ дэеу ешIагъ, хьакIэхэр хэпшIыкIэу нахь лъэшыгъэх. «Динамо-МГТУ-м» Мыекъуапэ щыриIэрэ зэIукIэгъухэм нахьыбэрэмкIэ дэгъоу закъыщегъэлъагъо, ау мызыгъэгум ар къыдэхъугъэп — пчъагъэр 89:59-у «Деснам» текIоныгъэр къыдихыгъ.
Апэрэ зэIукIэгъум хэукъоныгъэу ашIыгъэхэр тибаскетболистхэм къыдалъыти, ятIонэрэм нахь дэгъоу зыфагъэхьазырыгъ ыкIи ащ ишIуагъэкIэ ешIэгъур къахьыгъ, пчъагъэр – 69:51.
«Динамо-МГТУ-м» хэт Константин Клементьевыр ешIэкIо анахь дэгъоу къыхахыгъ, зэIукIэгъуитIум ащ очко 42-рэ ащыригъэкъугъ. ШэкIогъум и 25 – 26-м тикомандэ Чебоксары щешIэщт. Тиспортсменхэм тагъэгушIонэу, текIоныгъэм фэбэнэнхэу тащэгугъы.