Адыгеим ынаIэ зытыригъэтырэ Геническэ районэу Херсон хэкум хахьэрэм щыIагъэх УФ-м и Президент и Администрацие ипащэ иапэрэ гуадзэу Сергей Кириенкэмрэ Урысыем псауныгъэр къэухъумэгъэнымкIэ иминистрэу Михаил Мурашкэрэ.

Ащ фэгъэхьыгъэу исоциальнэ нэкIубгъохэм къащитхыгъ Адыгеим и ЛIышъхьэу КъумпIыл Мурат. Херсон хэкум щыIэныгъэр зэрэщызэтеуцожьырэр, инфраструктурэм изэтегъэпсыхьажьын ­Адыгеир чанэу зэрэдэлажьэрэр ащ къыриIотыкIыгъ. Партиеу «Единэ Россием» игъу­сэхэу цIыфхэм ящыIакIэ нахьышIу ашIыным дэлажьэх, социальнэ щыIэкIэ-псэукIэр зэтырагъэуцожьы.
ЛIышъхьэм къызэритыгъэмкIэ, 2024-рэ илъэсым Геническэ районым физкультурэм ыкIи псауныгъэм изэтегъэуцожьын афытегъэпсыхьэгъэ я 4-рэ комплексыр къыщызэIуахыгъ, спортым зыщыпы­лъыщтхэ чIыпIэ ­щашIыгъ ыкIи зы еджапIэм ищагу зэтырагъэпсыхьажьыгъ. Мы илъэситIум бэ зэшIуахынэу зигъо ифагъэхэр: спортобъект­хэр ашIыгъэх, общественнэ чIыпIэхэр, кIэлэцIыкIу Iыгъы­пIэхэр ыкIи еджапIэхэр агъэцэкIэжьыгъэх ыкIи зэIуа­хыгъэх, район музеим ыгупэ агъэ­кIэжьыгъ. Къэралыгъо ыкIи муниципальнэ фэIо-фашIэхэр Iэрыфэ­гъоу афагъэцэкIэнхэм пае Iофыгъуабэмэ ателъытэгъэ гупчэ (МФЦ) афагъэпсыгъ. Адыгеим имедицинэ IофышIэхэр Геническэ районым щыпсэухэрэм упчIэжьэгъу афэхъух ыкIи яIазэх проектэу «Псауныгъэм имэшIоку» зыфиIорэм къыдыхэлъытагъэу, джащ фэдэу илъэс къэс гъэмафэрэ кIэлэцIыкIухэм защагъэпсэфы республикэм икъэлэ кIыб щыIэ лагерьхэм.

Сергей Кириенкэм зэригъэлъэгъугъэх социальнэ псэуалъэхэмрэ цIыфхэр нахьыбэу зыщызэрэугъоирэ чIыпIэхэмрэ, Iофэу мыщ щызэрахьэрэм къыкIэкIуагъэм уасэ фишIыгъ, еджапIэхэм ащыщ щеджэхэрэмрэ икIэлэегъа­джэхэмрэ адэгущыIагъ. Адыгеим ипсэолъэшIхэм ягъусэу физкультурнэ комплексэу тишъо­лъыр мы илъэсым ышIыгъэм екIолIагъ. ПсэолъакIэм егъэ­джэнхэр, ныбжьыкIэхэр зыхэлэжьэщтхэ Iофтхьабзэхэр, спорт ухьазырынхэр щызэхащэхэзэ ашIыщт.
«Геническэ районым УФ-м и Президент къытфигъэуцурэ пшъэрылъхэмкIэ щызэшIотхырэ пстэуми Херсон хэкум щыпсэухэ­рэр къыхэлажьэх, ахэм яшIошIхэр ыкIи яшIоигъоныгъэхэр къыдыхэтэлъытэх. IофышIум нахь зэпэблагъэ уешIы. Сицыхьэ телъ мы зэдэлэжьэныгъэм тишъолъыр зэпхыныгъэхэр зэригъэпытэщтхэм ыкIи ­щыIэныгъэр нахьышIу шIыгъэным зэрэфэIорышIэщтым!» — къытхыгъ КъумпIыл Мурат.
Къэралыгъом псауныгъэр къэухъумэгъэнымкIэ и Министерствэ ипащэ мы къулыкъум епхыгъэу лажьэрэ учреждениехэм аIутхэм заIуигъэкIагъ, Iофэу щызэшIуахырэм зыщигъэгъозагъ.
УФ-м псауныгъэр къэухъумэгъэнымкIэ и Министерствэ иунашъокIэ Адыгеим имедицинэ IофышIэхэм Херсон хэкум и Геническэ район яIофшIэн щыпа­дзэжьы. Апэрэ медицинэ IэпыIэгъу ягъэгъотыгъэным ыкIи Iэзэгъу уцхэр цIыфхэм аIэкIэгъэхьэгъэнхэм афэгъэхьыгъэ IофыгъохэмкIэ гупчэ район сымэджэщым Iутхэм упчIэжьэгъу ахэр афэхъух.

Джырэ уахътэм Геническ щыIэх Адыгеим имедицинэ IофышIи 7. Ахэр яIоф­шIэгъухэм адэIэпыIэх псауныгъэм икъэухъу­мэнкIэ урысые шапхъэхэр терапевтическэ ыкIи педиатрическэ участкэхэм зэряпхьылIэщтхэмкIэ.
«IофшIэкIэ амалхэмкIэ мыщ фэдэу зэхъожьынхэм мэхьэнэ ин иI Херсон хэкум имедицинэ учреждениехэм шIуагъэ къэ­зытыщт лэжьакIэ къащыхэхыгъэнымкIэ. Ащ медицинэ IэпыIэгъур зэращарагъэгъотырэм идэгъугъэ къызэриIэтыщтым сицыхьэ телъ», — къыкIигъэ­тхъыгъ ­КъумпIыл Мурат.
Сурэтхэр: АР-м и ЛIышъхьэ и ТГ-канал