Бжыхьэ дзэ дэщыгъом къыдыхэлъытагъэу, Урысыем и УIэшыгъэ КIуачIэхэм къулыкъур ащызыхьыщт ныбжьыкIэхэм язичэзыу куп тыгъуасэ гъогу техьагъ. Нэбгыри 10-у мэфэкI шIыкIэм тетэу агъэкIотагъэхэм ошъогу-десантнэ дзэу Новороссийскэ дэтым къулыкъур щахьыщт.

Iофтхьабзэу АР-м идзэ комиссариат щыкIуагъэм хэлэжьагъэх хабзэм, патриотическэ ыкIи общественнэ организациехэм ялIыкIохэр, дзэ къулыкъум иветеранхэр, ны-тыхэр.
Ар къызэIуихыгъ ыкIи зэрищагъ дзэ комиссар шъхьаIэм иIэпыIэгъоу Одэжьдэкъо Руслъан.
АР-м идзэ комиссар игуадзэу Сергей Сергеевым къэзэрэугъоигъэхэм шIуфэс гущыIэхэмкIэ закъыфигъэзагъ.
— Непэ къыщегъэжьагъэу хэгъэ­гум шъуриухъумакIу. Дзэ политикэ Iофхэм язытет зэрэдунаеу зыщыкъин уахътэм къулыкъушIэ дэгъухэр гъэхьазырыгъэнхэм мэхьанэшхо иI. ЛъэгэпIэшIухэм адиштэрэ дзэхэм ащыщым къулыкъур щышъу­хьынэу шъуинасып къызэрихьыгъэм шъурыгушхон фае. Къэралыгъор къэухъумэгъэныр пшъэ­рылъ шъхьэIэу шъуиI, ар ­щытхъу хэлъэу жъугъэцэкIэн, узынчъэу къэжъугъэзэжьынэу шъуфэсэIо, — къыIуагъ Сергей Сергеевым.
Къыблэ дзэ шъолъырым изэхэт стратегическэ командование иинспектор куп хэтэу Александр Дорофеевым ныбжьыкIэхэм закъыфигъэзагъ.

— Урысыем и УIэшыгъэ КIуа­чIэхэм шъуахэтэу къэралыгъор къэшъуухъумэным игъо къэсыгъ. Анахь пшъэдэкIыжь ин зыпылъ едзыгъоу щыIэныгъэм къыхафэхэрэм мыр ащыщ. Ащ унагъом, еджапIэм, шъущыфагъэ­хьазырыгъ. Дзэ къулыкъум зызэрыщышъумыдзыягъэр щыт­хъоу шъуфэсэлъэгъу. Шъузда­щэщт ошъогу-десантнэ дзэм хэт­хэм ащыщхэм хэушъхьафыкIыгъэ дзэ операцием зэрифэшъуа­шэу япшъэрылъхэр щагъэцакIэх. Шъо а плъыр-стыр чIыпIэм шъуамыщэщтми, тылым шъущыIэу ахэм яIоф къэ­жъугъэпсынкIэным шъу­пылъын фае. Шъугъогу маф!, — къыIуагъ генерал-майорым.
Мыекъопэ къэлэ администрацием ипащэ игуадзэу, генерал-лейтенантэу Юрий Томчак гущыIэр лъигъэкIотагъ.
— Непэ тидзэкIолIхэм хэушъхьафыкIыгъэ дзэ операцием лIыхъужъныгъэ щызэрахьэ. ТикIалэхэм дзэ къулыкъум зыщамыдзыеу ащ зэрыкIохэрэм мэхьанэшхо иI. ДзэкIолI шъузэрэхъу­гъэр къыжъугурыIон фае, пшъэрылъэу шъуиIэхэр щытхъу хэлъэу, тыкъэшъумыгъэу­кIытэжьэу жъугъэцэкIэнхэу тыкъышъущэгугъы. Республикэри, дзэ комиссариатри, шъуиунагъуи къызэрэшъуажэхэрэр зыщышъумыгъэгъупш, — хигъэунэфыкIыгъ Юрий Томчак.
Нэужым къэзэрэугъоигъэхэм гъогу техьэгъэ дзэкIолIхэр агъэкIотагъэх.
Iэшъынэ Сусан.
Сурэтхэр: Артур Лаутеншлегер.