Хьасанэкъо Мурат ишIухьафтынхэм афэбэнэщтых
СамбэмкIэ дунаим гъогогъу 11-рэ ичемпионэу, Урысыем спортымкIэ имастерэу Хьасанэкъо Мурат ишIухьафтынхэр зэрылъ я VIII-рэ Урысые турнирэу Мыекъуапэ щызэхащэщтым 2007 – 2009-рэ илъэсхэм къэхъугъэ кIалэхэм зыщаушэтыщт.
Мыщ дэгъоу зыкъыщызыгъэлъагъохэрэм Урысыем ипервенствэ хэлэжьэнхэмкIэ путевкэ къыдахын алъэкIыщт. Джащ фэдэу хагъэунэфыкIырэ чIыпIэхэр къэзыхьыгъэхэм ахъщэ шIухьафтынхэр афагъэшъошэщтых. ШIухьафтын фондыр сомэ мин 500 мэхъу.
Турнирыр шэкIогъум и 16-м сыхьатыр 10-м спорт комплексэу «Ошъутенэм» къыщызэIуахыщт. Финал зэIукIэгъухэр сыхьатыр 4-м рагъэжьэщтых.