Мыекъуапэ иурамэу Первомайскэм тет IэзапIэм мы уахътэм щыжъот, игъэкIотыгъэ гъэцэкIэжьынхэр щэкIох. Псауныгъэм икъэухъумэнкIэ пэублэ къулыкъум игъэкIэжьын къыдыхэлъытагъэу ахэр зэшIуахых.

Ар игъо шъыпкъэу щыт, сыда пIомэ IэзапIэм изытет дэигъэ, дэпкъхэр къе­тэкъохыщтыгъэх, джэхашъор пхырызыщтыгъ, шъхьангъупчъэхэм жьыр къа­дэкIыщтыгъ.
Къэлэ гупчэм ит IэзапIэр цIыф кIуапIэу щыт, стационар отделение хэтэу, сымэджэщым кIонхэ имыщыкIагъэу мыщ капельницэхэр ащафыхагъэуцох, сымаджэхэм яфэIо-фашIэхэр афагъэцакIэх.
IэзапIэм ипащэу Къэлэкъутэкъо Еленэ къызэриIуагъэмкIэ, псауныгъэм икъэухъу­мэнкIэ пэублэ къулыкъум игъэкIэжьын тегъэпсыхьэгъэ республикэ программэм къыдыхэлъытагъэу игъэкIотыгъэ гъэцэкIэжьын IофшIэнхэм АР-м псауны­гъэр къэухъумэгъэнымкIэ и Министерствэ кIэщакIо афэхъугъ. Федеральнэ ыкIи шъолъыр бюджетхэм къахэкIыгъэ мылъкоу сомэ миллион 20-рэ мин 337-рэ гъэцэкIэжьынхэм апэIухьащт.

— Поликлиникэм игъэцэкIэжьын бэшIагъэу тежэщтыгъ. Ар 1986-рэ илъэсым ашIыгъ, ащ ыуж зыкIи агъэцэкIэжьыгъэп. Ащ къыхэкIэу IэзапIэм изытет уигъэрэзэнэу щытыгъэп, джэхашъом телъ паркетыр, линолеумыр къитхъы­гъэх, дэпкъхэр зэхэтэкъуагъэх. Сымаджэу къытфакIохэрэмкIи, мыщ Iоф щызышIэхэрэмкIи IэзапIэм изытет гум ыштэщтыгъэп, — къыIуагъ Къэлэкъу­тэкъо Еленэ.
IэзапIэм ипащэ къызэрэхигъэщыгъэ­мкIэ, игъэкIотыгъэ гъэцэкIэжьынхэр макIох нахь мышIэми, яIофшIэн къызэтырагъэуцуагъэп. Поликлиникэр зычIэт унэр тIоу агощыгъэу зы кIэлъэныкъом гъэцэкIэжьынхэр щэкIох. Ар тыгъэгъазэм ыкIэм нэс къаухынэу мэгугъэх. Нэужым ащ кощыжьыщтых ыкIи къэнэгъэ кIэлъэ­ныкъор агъэцэкIэжьыщт. 2025-рэ илъэсым мэлылъфэгъум ехъулIэу гъэцэкIэжьынхэр къаухынэу ары зэрагъэ­нафэрэр. Джырэ шапхъэхэм адиштэу ар зэтырагъэпсыхьащт.
— IэзапIэм зэхъокIыныгъэшIухэр фэхъущтых, ащ тегъэгушIо ыкIи кIуачIэ къытхилъхьэзэ Iоф тэшIэ. Зынэмысыщтхэ чIыпIэ къэнэщтэп, мы уахътэм дэпкъыр агъэтэкъуагъэу икIэрыкIэу кIаижьы, электричествэр, шъхьангъупчъэ­хэр зэблахъух, канализациер кIэу ашIыщт, фабэр къэзытырэ котелыр зэблахъущт. Мыщ ыпэкIэ къатыбэу зэтет унэм тыхахьэщтыгъ, джы ащ тепхыжьыгъэщтэп, котел шъхьаф тиIэу тыкъагъэ­фэбэщт, — къыIуагъ пащэм.
КъэIогъэн фае, IэзапIэм нэбгырэ мин 11-рэ 300-рэ епхыгъэу Iоф ешIэ. ЗэкIэмкIи мыщ нэбгырэ 50 фэдиз щэлажьэ. Пащэм къызэриIуагъэмкIэ, ящыкIэгъэ Iэмэ-псымэхэмкIэ, оборудованиемкIэ мыр зэтегъэпсыхьагъ: томограф яI, ЭКГ кабинетым, стационар отделением ыкIи процедурнэ кабинетхэм Iоф ашIэ. Ащ нэмыкIэу хэушъхьафыкIыгъэ машинэ яIэу нэжъ-Iужъхэу поликлиникэм къэмыкIошъухэрэм адэжь врачхэр кIохэзэ яфэIо-фашIэхэр афагъэцакIэх. Отоларингологым нэмыкIэу зэкIэ специалистхэр афекъу. Нэхэм яIэзэрэ врачым ыныбжь елъытыгъэу IукIыжьыгъэм ычIыпIэ, ащ нэмыкIэу медсестра нэбгыритIу къаштагъэх. Мы уахътэм джыри участковэ медсестра нэбгыритIумэ ащэкIэх.

АР-м и ЛIышъхьэу КъумпIыл Мурат псауныгъэм икъэухъумэнкIэ IэзапIэхэм ягъэкIэжьын епхыгъэ программэм игъэ­цэкIэн лъэшэу ынаIэ тет. Мы аужырэ илъэсхэм медицинэ учреждениехэр джырэ шапхъэхэм адиштэу зэтегъэ­псыхьэгъэнхэмкIэ республикэм Iофышхо щызэшIуахыгъ. Учреждениябэ агъэцэкIэжьыгъ, сымэджэщхэр, IэзапIэхэр, фельдшер-мамыку пунктхэр, амбулаториехэр агъэпсыгъэх. Врачхэм агу къыдэчъэу Iоф ашIэнымкIэ, сымаджэхэм яIэзэгъэнымкIэ амал дэгъухэр аIэкIэлъ хъугъэ, джырэ уахътэм диштэрэ оборудованиер ачIэт.
АР-м псауныгъэр къэухъумэгъэнымкIэ и Министерствэ къызэрэщаIуагъэмкIэ, псауныгъэр къэухъумэгъэным ипэублэ къулыкъу гъэкIэжьыгъэным тегъэпсыхьэгъэ шъолъыр программэм диштэу 2021-рэ илъэсым къыщегъэжьагъэу псэолъи 6-мэ игъэкIотыгъэ гъэцэкIэжьынхэр арашIылIагъэх. НэмыкI программэхэмкIэ оборудованиякIэ, автомобильхэр къащэфыгъэх, псэуалъэхэр агъэцэкIэжьыгъэх. 2025-рэ илъэсым медицинэм иучреждени 5-мэ игъэкIотыгъэ гъэцэкIэжьынхэр арашIылIэнхэу рахъухьэ.
КIАРЭ Фатим.
Сурэтхэр: Артур Лаутеншлегер.