АР-м и Къэралыгъо Совет – Хасэм къихьащт 2025-рэ илъэс бюджетым ыкIи 2026 — 2027-мкIэ агъэнэфагъэхэм афэгъэхьыгъэ хэбзэгъэуцугъэм ипроект тегущыIэнэу ригъэжьагъ.

Бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб зэпхыныгъэхэмкIэ АР-м и Парламент и Комитет ащ фэгъэхьыгъэ игъэкIотыгъэ зэхэсыгъо тыгъуасэ иIагъ. Iофтхьабзэм хэлэжьагъэх Къэралыгъо Советым – Хасэм и Тхьаматэу Владимир Нарожнэр, ащ игуадзэу Цэй Эдуард, АР-м и Правительствэ и Тхьаматэ игуадзэу, финансхэмкIэ министрэу Виктор Орловыр, Парламентым идепутатхэр, нэмыкIхэр. Зэхэсыгъор зэрищагъ республикэ Парламентым и Тхьаматэ игуадзэу, бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб зэпхыныгъэхэмкIэ Комитетым ипащэу Iэщэ Мухьамэд.
ЫпэрапшIэу бюджетым фэгъэхьыгъэ законопроектэу Парламентыр апэрэ еджэгъумкIэ зыхэплъэщтым къыщыдэлъытагъэхэм финансхэмкIэ министрэр къатегущыIагъ. ЗэрэгугъэхэрэмкIэ, 2025-рэ илъэс бюджетым хахъохэмкIэ иIахь сомэ миллиард 32,1-рэ, хъарджхэмкIэ миллиард 34,3-рэ зэрэхъущтыр. Сомэ миллиарди 2,2-рэ щыкIагъэ фэхъущт. Хахъохэм япроцент 96-рэ фэдизыр хэбзэIахьхэмрэ мыхэбзэIахьхэмрэ къа­хэкIыщт.
АР-м и УплъэкIокIо-лъытэкIо палатэ ипащэу Павел Стаценкэм проектым зыхаплъэхэм зэфэхьысыжьэу ашIыгъэхэм къатегущыIэзэ, лъэныкъо зэфэшъхьафхэм къахэкIыгъэу сомэ миллиони 100-кIэ бюджетым ихахъохэр нахьыбэ шIыгъэнхэ амал щыIэу зэрагъэунэфыгъэр къы­Iуагъ.
Комитетыр ащ зытегущыIэм ыуж апэрэ еджэгъумкIэ зыхэплъэщтхэ законопроектым гъэтэрэзыжьынхэр фэшIыгъэнхэ фаеу зэдаштагъ. А пчъагъэри хэтэу 2025-рэ илъэс бюджетым ихахъо­хэр сомэ миллиард 32,2-рэ, хъарджхэр миллиард 32,4-рэ хъущтых, сомэ миллиарди 2,2-рэ щыкIагъэ фэхъущт.
Бюджетым фэгъэхьыгъэ хэбзэгъэуцугъэм ипроект АР-м и Парламент изичэзыу зэхэсыгъо щытегущыIэнхэшъ, апэрэ еджэгъумкIэ аштэнэу къыхалъхьащт.
ШIокI зимыIэ медицинэ страхованиемкIэ АР-м и ЧIыпIэ фонд 2025-рэ илъэсымкIэ ибюджет ыкIи 2026 — 2027-мкIэ агъэнэфагъэхэм афэгъэхьыгъэ хэбзэгъэуцугъэм ипроектэу апэрэ еджэгъум фагъэхьазырыгъэм зыпари гъэтэрэзыжьын имыIэщтэу ары зэхэсыгъом къызэрэщаIуагъэр. 2025-рэ илъэс бюджетым хахъохэмкIи хъарджхэмкIи иIа­хьхэр зэфэдизых, сомэ миллиарди 9,8-рэ зэрэхъухэрэр. Ащи Парламентым изэхэсыгъоу къэблагъэрэм депутатхэр щыхэплъэщтых.
Нэужым 2024-рэ илъэсым имэзибгъу республикэ бюджетымрэ шIокI зимыIэ медицинэ страхованиемкIэ АР-м и ЧIыпIэ фонд ибюджетрэ гъэцэкIагъэ зэрэхъу­гъэхэм тегущыIагъэх. Республикэ бюджетым хахъохэмкIэ иIахь а уахътэм сомэ миллиард 33,1-рэ, хъарджхэр миллиард 32,7-рэ зэрэхъугъэхэр. Бюджетым щыкIагъэ фэхъугъэп, сомэ миллион 380,7-кIэ хахъохэр нахьыбэ хъугъэх.
ФинансхэмкIэ министрэм къызэриIуа­гъэмкIэ, ахъщэм инахьыбэр, ар сомэ миллиард 21,2-рэ, социальнэ лъэныкъом фэгъэзэгъэ учреждениехэм афэкIуагъ. Зигугъу ашIырэ пIалъэмкIэ пшъэрылъэу зыфагъэуцужьыгъагъэр хэзыгъэ имыIэу гъэцэкIагъэ хъугъэ.
ХЪУТ Нэфсэт.