Лъэпкъ проектэу «щынэ­гъончъэ ыкIи шэпхъэшIухэм ади­штэрэ гъогухэр» зыфиIорэм къыды­хэ­лъы-
тагъэу Яблоновскэ къэлэ псэупIэм мы илъэсым шапхъэ­хэм адиштэу гъогуиплI щызэтыра­гъэ­псыхьажьыгъ километри 2,5-рэ фэдиз якIы­хьагъэу.

Муниципальнэ гъэпсыкIэ зиIэ Яблоновскэ къэлэ псэупIэм иадминистрацие къызэрэщаIуагъэмкIэ, 2024-рэ илъэсымкIэ агъэнэфагъэм диштэу гъогушIхэм урамхэу Коммунаровым, Карл Маркс ыцIэ зыхьырэм, Центральнэм ЯблоновскэмкIэ, поселкэу Новэм «Строительхэм яурам» зыфиIорэм ягъогу Iахьхэр шапхъэхэм адиштэу зэтырагъэпсыхьажьыгъэх. IофшIэнхэр зэкIэ зэшIуахынхэм пае сомэ миллион 250-рэ къафыхагъэкIыгъ.
Джырэ уахътэм псэолъэшI ­хъызмэтшIапIэу «Дортранссервисым» 2025-рэ илъэсымкIэ агъэ­нэфагъэм щыщэу урамэу Промышленнэм тет унэу N 18-м къыщыублагъэу Теуцожьым ыцIэ зыхьырэм нэс гъэцэкIэжьын IофшIэнхэр щызэ­шIуахых.
Джащ фэдэу ощхэу къещхырэр зэрылъэдэщтым изэтегъэпсыхьан, урам остыгъэхэм ягъэуцун, лъэс гъогухэм яшIын, автомобильхэр зэрыкIорэм асфальт телъхьэгъэныр, гъогу напцэхэм ягъэпытэн гъогу псэолъэшIхэм зэрэзэшIуахыщтхэр администрацием къыщаIуагъ.

Гъогум икIыхьагъэ километрэ 1,1-рэ. Урамэу Промышленнэм щызэрахьащт IофшIэнхэм апае сомэ миллиони 164,3-рэ къафатIупщыгъ. Ахэр аухынхэу агъэнафэ мы илъэсым итыгъэгъэзэ мазэ ыкIэм.
Гъогухэм яшIын тегъэпсыхьэгъэ лъэпкъ проектыр Адыгеим чанэу зэрэщагъэцакIэрэмкIэ теубытагъэ хэлъэу къэпIон плъэкIыщт Урысыем ипащэ ащкIэ къыгъэуцурэ пшъэрылъхэм республикэм иIэ­шъхьэтетхэм яшъыпкъапIэ зэрэра­хьылIэрэр ыкIи ащ транспорт инфраструктурэм изэтегъэпсыхьанкIэ шIуагъэ къызэритырэр.