Адыгэ Республикэм икъыблэ лъэныкъо щыI. Метрэ минитIум ехъу илъэгагъ. ИжъыкIэ мыщ адыгэхэм ябылымхэр щаIыгъыщтыгъэх. Къушъхьэхъу гъогоу Лэгъо-Накъэ екIуалIэщтыгъэхэм ащыщхэр къызэтенагъэу джыри щыIэх. Къушъхьэ шыгум адыгэ чIыпIацIэхэу бэ уапэ къыщифэрэр. Ахэм ащыщых Абдзахэмэ яхъупI, ХьамцIыргуай, Блалъ, Псынэдах зыфиIохэрэр.
Къушъхьэм ыцIэ къызхэкIынэу хъугъэм ехьылIагъэу адыгэхэм ижъыкIэ къыщыкIэдзагъэу хъишъэ гъэшIэгъон ахэлъ.
Лэгъо-Накъэ цIитIоу зэхэт: Лагъо — кIалэм ыцI, Накъэ — пшъэшъацIэ. НыбжьыкIитIур шIу зэрэлъэгъугъэх, ау ахэм янасып гъогу пшъа­шъэм ятэ къытеуцуагъ. Ар — тыр — лъэрыхьагъ, баигъ. Арыти, мылъку зимыIэ кIэлэ тхьамыкIэм ипшъашъэ рипэсыщтыгъэп. Мафэ горэм Лагъорэ Накъэрэ загъэбылъи ашъхьэ рахьыжьэжьыгъ, ау шIэхэу къашIэхи, ауж ихьагъэх. КъакIэхьапэхэ зэхъум, нэбгыритIуми къушъхьэ лъагэм зыкъырадзыхыжьыгъ. Джаущтэу шIу зэрэлъэгъугъэ нэбгыритIум ящыIэныгъэ ухыгъэ хъугъэ. Ащ ыуж илъэсишъэ пчъагъэ тешIэжьыгъ. Ау нэбгыритIумэ ацIэ егъашIэми цIыфхэм ащымыгъупшэжьынэу къушъхьэм епхыгъэу къызэрэнагъэр къытхыжьыгъ шIэныгъэлэжьэу Мэрэтыкъо Къасимэ.