Бэгъ Нурбый
(1937 —1994)
1962-рэ илъэсым щегъэжьагъэу усакIом ытхыхэрэр хиутыгъэх. Бэгъым усэ сборникхэр адыгабзэкIэ бэу ытхыгъэх: «Хъя­рым пчъэр фыIусэхы», «Ты­гъэпс», «Гъэбэжъу огъот», «Гъэ­тхэ нэплъэгъу», «ГъэшIэрэ тын» ежь щыIэзэ къыдэкIыгъэх.
Иусэхэр зыдэтэу «Поле доб­ра» зыфиIорэр Москва къы­­щы­дэкIыгъ. Бэгъыр журналист премиеу Хъ. Андырхъуаем ыцIэ­­кIэ агъэнэфагъэм илауреатыгъ, АР-м культурэмкIэ изаслуженнэ IофышIагъ. Урысыем итхакIохэм я Союз 1989-рэ илъэсым къыщыублагъэу хэ­тыгъ.

ГъукIэлI
Нурбый
Къэралыгъо ыкIи общественнэ IофышIэ чанэу ищыIэныгъэ къырэкIо.
Я 2000-рэ илъэсхэм иныдэлъ­фыбзэкIэ тхэным зыритыгъ: гъэ­зетэу «Адыгэ макъэм» гу зылъыозыгъэтэрэ рассказ зэфэшъхьафхэр къыщыхиутыгъэх. Ахэм иадыгабзэ зэрэбаир, зэ­рэхъуаур, тхэкIэ амал дэгъу зэрэIэкIэлъыр къахэщыгъ.
ГъукIэлI Нурбый прозэкIэ тхыгъэ тхылъи 5-м яавтор: «Гъа­шIэм игумэкIхэр», «Жъогъо шIу­цIэхэр», «Жьыбгъэм ыхьырэ тхьапэхэр», «Джэнэт лъэгум икIэй», «Аужырэ оркъ».
Усэныри дэгъоу къыдэхъу.
Н. ГъукIэлIыр Урысыем итха­кIохэм я Союз 2005-рэ илъэсым хэхьагъ.

Хъалыщ
Сэфэрбый
(1940 — 2022)
Ар егъашIэм кIэлэегъэджагъ. Ытхыхэрэр 1963-рэ илъэсым щегъэжьагъэу хиутыгъэх.
Тхы­лъэу къыдигъэкIыгъэхэр: ­«СшIошъ мэхъу», «Чэтэ чIэ­гъым», кIэлэцIыкIухэм апае усэ тхылъэу «Гъогумаф, пцIэшхъо цIыкIур!»
Хъалыщ Сэфэрбый Урысыем итхакIохэм я Союз 1987-рэ илъэсым къыщыублагъэу хэтыгъ.

ЯхъулIэ Сэфэр
(1914 — 1977)
УсакIом ны-тыхэр пасэу чIини, ибэу къэнагъ. Iофым ыIэ екIоу, еджэным зылъищэу къэтэджыгъ. Хэгъэгу зэошхор ынэ кIэкIыгъ, совет хэбзакIэм фэшъыпкъагъ — ащ ригъэджагъ, къыIэтыгъ.
Ытхыхэрэр 1938-рэ илъэсым щегъэжьагъэу хиутыгъэх. Усэхэмрэ поэмэхэмрэ зыдэт тхылъхэр бэу адыгабзэкIэ Сэфэр къыдигъэкIыгъэх. «Орэд къэс­Iощт», «Стиххэр», «ПсыорыпI», «Мэз тамэу си ПкIашъ», нэмыкI­хэри. УрысыбзэкIи итхылъхэр къыхаутыгъэх. Иусэхэм арылъ орэдхэр бэу аусыгъэх, усэкIо-­орэдусыгъ» аIо джащ паекIэ.
С. М. ЯхъулIэр Урысыем итха­кIохэм я Союз 1963-м къы­щегъэжьагъэу хэтыгъ.