Зипсауныгъэ амалхэр зэщыкъогъэ цIыфхэр, анахьэу зэрамылъэгъурэмкIэ сэкъатныгъэ зиIэхэм, зэрящыкIагъэхэр, обществэм ищыIэныгъэ хэлажьэхэу зэхашIэным мэхьанэшхо иI. Ахэм гукIочIэ инэу ахэлъым зэрепхых, ащ ишIуагъэкIэ япсэукIэ гъэшIэгъонэу зэхащэн, щыIэныгъэм зыкъыхагъотэн алъэкIы.

Хьафизэхэм я Урысые обществэ ичIыпIэ къутамэу Тэхъутэмыкъое районым щыIэм итхьаматэу Нэгъой Сусаннэ ахэм зэу ащыщ. Ар мы IэнатIэм зыIутыр илъэсищ нахь мыхъугъэми, яIофыгъохэм икъоу защигъэгъозэн, зыкъаригъэштэн ылъэкIыгъ. Сусаннэ дэеу зылъэгъухэрэм ащыщ, ятIонэрэ купым хэхьэрэ сэкъатныгъэ иI. Ау ащ емылъытыгъэу чанэу иIофшIэн зэригъэцэкIэщтым пылъ.
— Апэрэ классым сисэу «кератоконус» зыфиIорэ узыр къысхагъэщыгъ ыкIи нахьыбэрэ седжэ къэс сынэхэм язытет къызэрэзэIыхьырэр къысхэщыщтыгъ. Гурыт гъэсэныгъэ зэзгъэгъотыгъ, нэужым заочнэу экономикэмкIэ ыкIи гъэIорышIэнымкIэ институтэу Краснодар дэтыр къэсыухыгъ. Илъэс 18 нахь сымыныбжьэу цIыфхэр социальнэу къэухъу­мэгъэнхэмкIэ къулыкъум сыIухьи, илъэс 25-рэ Iоф сшIагъэ. Инсульт сыхъуи, нэмыкI узхэри къызысфыкъокIыхэм Iоф­шIэныр къин сщыхъоу сыкъыIукIыжьыгъ. Сэкъатныгъи сиIэу, сысымэджэ дэеу слъытэзэ, сыгу кIодыгъэу унэм тIэкIурэ сисыгъэу мыщ сыкъыIухьанэу хъугъэ. Ащ тефэу культурнэ Iофтхьабзэ Краснодар щызэхащагъэу, тиобществэ хэтхэр хэлажьэхэти, садэкIуагъ. Мыщ дэжьым къызгурыIуагъ, сэ сызэрэмысымаджэр, сыда пIомэ хьафизэ дэдэхэр дэеу зылъэ­гъухэрэм ягъусэхэу къашъохэу «танго» ыкIи «вальс» зыфиIохэрэр къашIыгъэх. Зипсауныгъэ амалхэр зэщыкъуагъэхэр щыIэныгъэм зэрэфаблэхэрэм, агу мыкIодэу ащ зыкъыхагъотэным зэрэфэбанэхэрэм сэри кIуачIэ къыситыгъ, — къыхигъэщыгъ Нэгъой Сусаннэ.

ТигущыIэгъу зипэщэ чIыпIэ организацием мыгъэ июбилейнэ илъэс, ар зызэхащагъэр илъэс мэхъу. Непэрэ мафэм ехъулIэу ащ иучет нэбгыри 168-рэ хэт, ахэм ащыщэу 4-р – кIэлэцIыкIух, адрэхэр зэкIэри зыныбжь хэкIотагъэхэу, унаIэ зытетын фаеу, уафэгумэкIынэу щытых. ЩыIэныгъэм зыкъыхагъотэнымкIэ социальнэ IэпыIэгъу афэхъугъэнымкIэ, реабилитацие акIунымкIэ, загъэпсэфынымкIэ ящыкIагъэхэр арагъэгъотыныр организацием ипшъэрылъ шъхьаIэх.
— Анахь баиныгъэу тиIэр гукIочIэ ин зыхэлъ, шIур зышIэн гухэлъ зыдэзыIыгъ, гугъэным кIэзгъэгушIухэрэ цIыфхэр ары. Зы унэгъошхом фэдэу тызэхэт. Хэти гукъао иIэмэ, къэсымэджагъэмэ, иза­къоу къиныгъохэр зэпедгъэчырэп, тызэдеIэжьы, — хигъэунэфыкIыгъ С. Нэгъоим.
Джащ фэдэу тигущыIэгъу къыхигъэщыгъэхэм ащыщ республикэм щызэрахьэрэ социальнэ политикэм диштэу сэкъатныгъэ зиIэхэм яобщественнэ организациехэм IэпыIэгъу ягъэгъотыгъэ­ным республикэм и ЛIышъхьи, Тэхъутэмыкъое район администрацием ыкIи Яблоновскэ къэлэ псэупIэм ялIыкIохэми, депутатхэми анаIэ зэрэтырагъэтырэр. Сыд фэдэ Iофыгъо ахэм арахьылIагъэми къафамыгъэцакIэу къыхэкIыгъэп.
— Къэралыгъо мэфэкIхэу хагъэунэфыкIыхэрэм япхыгъэ культурнэ ыкIи спорт Iофтхьабзэу республикэм щызэхащэхэрэм зэкIэми тичIыпIэ общественнэ организацие хэтхэр чанэу ахэлажьэх, хагъэунэфыкIырэ чIыпIэхэр къыдахых. Тыдэ тыкIощтми, хьафизэхэр узэрэфаеу зепщэшъухэрэп, район администрациер IэпыIэгъу къытфэхъу. Илъэс къэс зэхащэрэ социальнэ Iофтхьабзэу «Бэщ фыжьыр» тирайон гъэшIэгъонэу щыредгъэкIокIыгъ, мыщ тиорганизацие илъэс пчъагъэ хъугъэу хэтхэр щагъэшIуагъэх. Джы а Iофтхьабзэр Мыекъуапэ щызэфашIыжьыщт, ащи тыхэлэжьэщт. Ащ нэмыкIэу тэр-тэрэу зэнэкъокъухэр шашкэхэмкIэ, дартсымкIэ, гирэ IэтынымкIэ зэхэтэщэх. Клуб «Хозяюшка» зыфиIорэр тиI, шхыныгъо зэфэшъхьафхэр тэупщэрыхьых, нэужым щай тызэдешъожьы. Мыщ фэдэ Iофтхьабзэхэм хьафизэхэмкIэ мэхьанэ яI, унэм мэфэ реным езэщэу имысынхэмкIэ, гущыIэгъу зэфэхъун­хэмкIэ, зыгорэ ашIэшъун зэралъэкIырэр къагъэлъэгъонымкIэ амалышIу мэхъух, — къыIуагъ хьафизэхэм ячIыпIэ организацие итхьаматэ.
КъэIогъэн фае, мыр общественнэ организациеу зэрэщытым къыхэкIыкIэ ежь ашъхьэ аIыгъыжьын зэрэфаер. Ащ пае амал зэриIэкIэ хэбзэ къулыкъухэм, унэе предпринимательхэм, лъэкI зиIэ цIыфхэм Сусаннэ зэпхыныгъэ адыриI. Илъэсищ нахь мыхъугъэми мы лъэныкъомкIэ Iоф зишIэрэр, икIыгъэ илъэсым сомэ мин 550-рэ къыугъоин ылъэкIыгъ.
— IофшIэным джыри къулайныгъэшхо фысиIэп арышъ, ащкIэ бэхэр упчIэжьэгъу сэшIых. Анахьэу хьафизэхэм я Урысые обществэ ичIыпIэ организациеу Мыекъуапэ дэтым итхьаматэу Алексей Хлоповым бэрэ сыфытео, сыфэраз зэкIэ дэгъоу къызгурегъаIо. Сомэ мин 550-рэ мылъкур ахъщэ къодыеу щытыгъэп, ащ хэхьэх гъомылапхъэхэр, щыгъынхэр, хъызмэт пкъыгъохэр, узэрэтхьакIэщтхэр, нэмыкIхэри. Районым щыпсуэрэ хьафизэхэр социальнэу ухъумэгъэнхэмкIэ, реабилитацие ыкIи абилитацие программэхэр пхырыщыгъэнхэмкIэ IэпыIэгъу къытфэхъурэ пстэуми тафэраз. Ахэр: Тэхъутэмыкъое район администрацием ипащэу Шъэо Аскэр, ащ игуадзэу Хьатитэ Сим, депутатхэу Апсэлямэ Руслъан­рэ Шэуджэн Сэфэррэ, Яблоновскэ къэ­лэ псэупIэм иадминистрацие ипащэу Атэжьыхьэ Заурдин, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «ДомХимБыт» зыфиIорэм ипащэу Натхъо Пщымаф, комплексэу «Зеленый дом» зыфиIорэм ипащэу Елена Бибичевар, шIушIэ фондэу «Тызэгъусэу тшIэн» зыфиIорэм ипащэу Барцо Руслъан, — къыIуагъ Нэгъой Сусаннэ.
IофшIэным дакIоу тигущыIэгъу унэгъо дахэ ышIэн ылъэкIыгъ. Ишъхьэгъусэрэ ежьыррэ сабыищ зэдапIугъ. Анахьы­жъэу Аскэр илъэс 21-рэ ыныбжь, ащ къыкIэ­лъэкIо Абрек, тIури еджагъэх, Iоф ашIэ. АнахьыкIэу Аминэ я 7-рэ классым ис, дэгъоу еджэ, олимпиадэхэм ахэлажьэзэ гъэхъэгъэшIухэр зэришIыгъэм фэшI ныбжьыкIэ гупчэу «Артекым» мы мэфэ благъэхэм агъэкIощт.
Iэшъынэ Сусан.