Финанс шIэныгъэхэмкIэ Фестивалэу республикэм щыкIорэм къы­дыхэлъытагъэу «Джырэ дунай финанс гъэсэныгъэ уиIэныр» зыфи­Iорэ Iэнэ хъурае партиеу «Единэ Россием» иобщественнэ штаб щыкIуагъ.

Мыекъопэ къэралыгъо технологическэ университетыр, АР-м финанс гъэсэныгъэмкIэ ишъо­лъыр гупчэ, АР-м финансхэмкIэ и Министерствэ яIэпыIэгъоу Iоф­тхьабзэм кIэщакIо фэ­хъу­гъэх.
Iэнэ хъураем министерствэ­хэм, къулыкъухэм, гъэсэныгъэ организациехэм ялIыкIохэр, сту­дентхэр хэлэжьагъэх, фи­нанс­хэмкIэ шъолъырым иIофхэм язы­тет ахэр тегущыIагъэх. Адыгэ Республикэм и Лъэпкъ банк ипащэу Сергей Самойленкэм пэублэ гущыIэр ратыгъ.
ФинансхэмкIэ пшъэдэкIыжьэу ахьырэр цIыфхэм агурыгъэIогъэ­ныр пшъэрылъ шъхьаIэу зэрэзыфагъэуцужьырэр ащ къыIуагъ.
— Мы илъэсым мэзаем Уры­сые Федерацием и Прави­тельствэ и Тхьаматэу Михаил Мишустиным финанс шIэныгъэ­хэм ыкIи культурэм япхыгъэ пшъэрылъыкIэхэр къыгъэуцу­гъэх, ащ къыдыхэлъытагъэу 2030-рэ илъэсым нэс телъытэгъэ план зэхэдгъэуцуагъ. Непэрэ Iэнэ хъураем илъэсым къыкIоцI IофшIэнэу зэшIотхы­гъэм изэфэхьысыжьхэр щытшIы­гъэх. Ахъщэр тэрэзэу гъэзекIогъэным иапэрэ лъэбэкъур финанс культурэр ары. Нэбгырэ пэпчъ имылъку тэрэзэу ыгъэIорышIэныр, хигъэхъон ыкIи бзэ­джашIэхэм ащиухъумэн фае. ГухэкI нахь мышIэми, гъэпцIакIо­хэм япчъагъэ хэхъо зэпыт, ахэм апэшIуекIогъэнымкIэ Iофтхьэбзэ зэфэшъхьафхэр республикэм щызэхащэх. Джырэ уахътэм «Трубкэр гъэтIылъ» зыфиIорэ Iофтхьабзэр Урысыем икъыблэ щэкIо. УмышIэрэ номер къыпфытеуагъэмэ удэмыгущыIэныр, трубкэр бгъэтIылъыжьыныр ары ащ къыдилъытэрэр, — къыIуагъ Сергей Самойленкэм.

Хабзэ зэрэхъугъэу, 2019-рэ илъэсым къыщегъэжьагъэу финансхэр ухъумэгъэнхэм фэ­гъэхьыгъэ Iофтхьабзэхэр рес­публикэм щызэхащэх. Мыекъопэ къэралыгъо технологическэ университетым АР-м иминист­рэхэм я Кабинет зэзэгъыныгъэ дишIыгъэу мы Iофыгъом дэлажьэх.
— Мы илъэсым къыщегъэжьагъэу цIыфхэм финансхэмкIэ шIэныгъэу аIэкIэлъым зэрэхэдгъахъорэм имызакъоу финанс культурэм епхыгъэуи Iофтхьа­бзэхэр зэхэтэщэх. МыщкIэ шIэ­ны­гъэхэр пIэкIэлъэу, ахъщэр зэ­рифэшъуашэу бгъэзекIон, ащ хэбгъэхъон плъэкIын фае, — къыIуагъ АР-м финансхэмкIэ иминистрэ иапэрэ гуадзэу Ека­терина Косиненкэм.
Мылъкум игъэзекIон ишапхъэ­хэм нэужым ар къатегущыIагъ.
Мы IофшIэным мэхьанэшхо иI, сыда пIомэ финансхэм ягъэ­зекIон щынэгъончъэп, мы лъэныкъом цIыфхэм нахь хэшIыкI фыряIэн фае.
ЦIыфэу агъэделэхэрэр нахь макIэ хъуным пае республикэм Iофэу щашIэрэм нэужым къэзэ­рэугъоигъэхэр тегущыIагъэх, ащ­кIэ пшъэрылъ гъэнэфагъэхэр зыфагъэуцужьыгъэх.
ДЕЛЭКЪО Анет.