Адыгэ Республикэм изаслуженнэ сурэтышIэу, Адыгеим исурэтышIхэм я Союз хэтэу Владимир Бредихиныр ыныбжь илъэс 75-рэ зэрэхъурэм фэгъэхьыгъэ Iофтхьабзэ АР-м и Сурэт къэгъэлъэгъуапIэ шэкIогъум и 6-м щыкIуагъ.

Жанрэ зэфэшъхьафхэм арылъ IофшIэгъи 100-м ехъу ащ хэ­хьагъ.
Владимир Бредихиныр 1949-рэ илъэсым къэхъугъ. ИщыIэны­гъэ зэрэщытэу Адыгеим ичIыопс икъэгъэлъэгъон фигъэхьыгъ. ИсурэтхэмкIэ тикъушъхьэ шыгу лъагэхэр, псыхъо чъэрхэр, чIы зэшъхьэ-зашъохэр, тишъолъыр ичIыопс ибаиныгъэ къырегъэлъэгъукIы. Ахэм псычъэр ма­къэхэр къахэIукIых, чIыопсым идэхагъэ къагъэлъагъо.
АР-м культурэмкIэ иминист­рэ игуадзэу Ольга Гавшинам зэхахьэр къызэIуихыгъ ыкIи сурэтшIын искусствэм хэхъоныгъэ ышIыным иIахь зэрыхилъхьа­гъэм пае Адыгеим культу­рэмкIэ и Министерствэ ирэзэныгъэ тхылъ Владимир Бредихиным зэхахьэм къыщыритыжьыгъ.
— Культурэм Iоф щызышIэ­хэрэм ацIэкIэ сурэтышI IэпэIа­сэм сыфэгушIо. ЛIэшIэгъуныкъо хъугъэу тыкъэзыуцухьэрэ дуна­им идэхагъэ Владимир Бре­дихиным ямышIыкIэу, куоу исурэт­хэмкIэ къырегъэлъэгъу­кIы. Адыгеим иискусствэ ихэ­хъоныгъэ иIахьышIу хишIыхьагъ, IэшIагъэу шъулъэгъухэрэр ащ ишыхьат, — къыIуагъ Ольга Гав­шинам.
ЗэлъашIэрэ сурэтышIэу Бырсыр Абдулахь къызэриIуагъэмкIэ, къэгъэлъэгъоным уеплъызэ, Адыгеим ичIыпIэ дахэхэм ятеп­лъэ нахьышIоу зыщыогъэгъуазэ.
Адыгэ Республикэм исурэтышIхэм я Союз итхьаматэу Елена Абакумовар сурэты-
шIым къыфэгушIуагъ. Гъэмэфэ жъоркъ­ми, кIымэфэ щтыргъукIми IэпэIасэр щагум дэтэу сурэт зэришIырэр ащ къыIотагъ. НэкIэ ылъэгъурэр IапэкIэ зэригъэчъы­рэр хигъэунэфыкIыгъ.
Урысыем изаслуженнэ сурэтышIэу Б. Воронкиным къызэриIуагъэмкIэ, сурэтышIыр мы­пшъыжьэу чIыопсым идэхагъэ къизыIотыкIырэ сурэтхэр ешIы. ЦIыфым ищыIэныгъэ гъогу къе­жьэпIэ гъэшIэгъон иI. Ар дунаим къытехъо, тыгъэм инурэ фабэ­хэр къынэсых, чIыопсым идэха­гъэ ыгу зэлъештэ, шIэныгъэмрэ гъэсэныгъэмрэ, дэхагъэмрэ шIумрэ лъэбэкъу инхэр ащи­дзынэу амал иIэ мэхъу. Ыныбжьи хахъо, идунэееплъыкIи зы­зэблехъу.
— Сюжетым фэгъэхьыгъэ IофшIагъэу сиIэр бэп, ау пейза­жымкIэ сурэти 100-м нахыбэ сшIыгъэ. Сэ зекIоныр сикIас, чIыпIакIэхэр зэсэгъэлъэгъу, пцэ­­­жъыяшэ сэкIо. Тыкъэзыуцухьэрэ дунаир нэкIэ сфэплъэ­кIырэп, гукIэ сикIасэу сэлъэгъу. ЧIыо­псым идэхагъэрэ икъэбзагъэрэ кIуачIэу къысатырэм си­IэшIагъэхэр къыпкъырэкIых. Насыпыгъ чIыопсым уригъусэныр, плъэ­гъуныр, удэгущыIэныр, — къы­Iуагъ В. Бредихиным.
Республикэм и Сурэт къэгъэ­лъэгъуапIэ щыкIогъэ зэхахьэм искусствэм хэщагъэхэр, кIэлэ­еджакIохэр, нэмыкIхэри хэлэ­жьагъэх.
Владимир Бредихиныр зыдэ­лэжьэгъэ сурэтхэр зышIогъэшIэ­гъонхэм тыгъэгъазэм и 7-м нэс еплъынхэ ыкIи уасэ фашIын алъэкIыщт.
Лъэпшъыкъо Фатим.