Финанс шIэныгъэхэм ахэгъэхъогъэным фэгъэхьыгъэ Iофтхьабзэу Мыекъуапэ щызэхащагъэхэм къадыхэлъытагъэу мы мафэхэм Мыекъопэ къэралыгъо технологическэ университетым истудентхэм театрализованнэ къэгъэлъэгъон кIэлэеджэкIо цIыкIухэм къафашIыгъ.

Адыгэ республикэ гимназием щеджэрэ кIэлэ­цIыкIухэр «Цыхьэ зэкIэми афэзышIырэ тхьакIумкIыхь» зыфиIоу адыга­бзэкIэ агъэуцугъэм ашIогъэшIэгъонэу еплъыгъэх. ЯцIыкIугъом къыщегъэ­жьагъэу ахъщэр тэрэзэу агъэзекIоным фэгъэсэгъэн­хэр, хъоршэрыгъэ зезы­хьэхэрэр зэрэщыIэхэр ыкIи ахэм защыуухъумэн зэрэфаер арагъэшIэныр ары пшъэрылъ шъхьаIэу зэхэщакIохэм зыфагъэуцужьыгъэр. КIэлэцIыкIухэм яныдэлъфыбзэкIэ къэгъэлъэгъоныр зэрэзэхагъэуцуагъэм мэхьанэшхо иI.
— Мы илъэсым апшъэ­рэ еджапIэм финанс шIэныгъэхэм япхыгъэ проектыкIэ зэхищагъ, ащ къыдыхэлъытагъэу кIэлэцIыкIухэм апае театрализованнэ къэгъэлъэгъон зэхагъэуцуагъ. Ар нахь къа­гурыIоным пае пшысэ цIыкIу фэдэу дгъэпсыгъэ. Непэ Адыгэ республикэ гимназием апэрэ къэгъэлъэгъоныр щыкIуагъ, кIэлэцIыкIухэм агу зэрэри­хьыгъэр нэрылъэгъу тфэ­хъугъ, тигуапэ хъугъэ. Мы Iофтхьабзэм студентхэм дэгъоу зыфагъэхьазырыгъ, чанэу хэлэжьа­гъэх, нэмыкI еджапIэхэми тыкIонэу тимурад, — къы­Iуагъ АР-м финанс гъэсэныгъэмкIэ ишъолъыр гупчэ ипащэу Татьяна Паладовам.

Мыекъопэ къэралыгъо технологическэ универ­ситетым иапэрэ курс щеджэрэ Дыхъу Дианэ
мы Iофтхьабзэм игуапэу зэрэхэлажьэрэр къы­Iуагъ.
— СиныдэлъфыбзэкIэ гъэуцугъэ къэгъэлъэгъоным сшIогъэшIэгъонэу сыхэлэжьагъ. Псэушъхьэ­хэм ахъщэр тэрэзэу зэрагощын, къызэрагъэгъу­нэн фаер мыщ къыщыреIотыкIы. КIэухым баджэр гъогу тэрэзым тырагъахьэ, тхьакIумкIыхьэм ахъщэр къыратыжьы. Сабыйхэр мыщ ригъэгупшысэщтых зябгъэгъэделэ ыкIи хъоршэрыгъэ зепхьэ зэрэмы­хъущтым, — къыIуагъ Дианэ.
ДЕЛЭКЪО Анет.
Сурэтхэр авторым иех.