2024-рэ илъэсым шэкIогъум и 5-м къыщегъэжьагъэу сурэт ыкIи видео тезыхырэ камерэу Мыекъуапэ иурам­хэм атырагъэуцуагъэхэм щынэгъончъэ бгырыпхыр зымыгъэфедэрэ водительхэр къыхагъэщынхэу аублагъ.

А хэбзэукъоныгъэр водителым имызакъоу, къыгосми фэгъэхьыгъ ыкIи ащкIэ административнэ пшъэдэкIыжьым къыдыхэлъытагъэу тазырэу сомэ 1000 арагъэтыщт.
Автомат шIыкIэм тетэу административнэ хэбзэукъоныгъэхэр тхыгъэнхэмкIэ Гупчэм ипащэу Николай Черемных къызэриIуагъэмкIэ, гъогу хъугъэ-шIа­гъэу республикэм щагъэунэфыгъэхэм язэ­фэхьысыжьхэм къагъэлъэгъуагъэр — ахэм ахафэхэрэм ядунай зэрахъожьырэм ыкIи шъобж хьылъэхэр зэрэхахырэм изы ушъхьагъухэм ащыщ щынэгъон­чъэ бгырыпхыр зэрамыгъэфедагъэр.
— Мы илъэсым имэзи 10 пштэмэ, Адыгеим игъогухэм аварие 376-рэ къа­техъухьагъ, ахэм нэбгырэ 68-рэ ахэкIодагъ, 427-мэ шъобжхэр атещагъэ хъугъэх. Водителым ыкIи ащ къыгос цIыфым щынэгъончъэ бгырыпхыр зэратемылъыр джырэ лъэхъаным диштэрэ сурэт ыкIи видео тезыхырэ комплексхэм къыхагъэ­щын амал яI, ащкIэ хабзэр зэраукъуа­гъэр къэзыушыхьатырэ сурэтэу техы­гъэр унашъоу ашIыгъэм рагъэгъусэ­жьыщт, — къыIуагъ Николай Черемных.
Комплексхэм Iоф зашIэгъэ тхьамафэм къыкIоцI тазыр 350-м ехъу къафыратхыкIыгъ.