Шыгъэчъэ Iофтхьабзэу Адыгеим и ЛIышъхьэ и Кубок зэрылъыр Теуцожь районым щыкIуагъ.

Къуаджэу Пэнэжьыкъуае къыщызэрэугъои­гъэх Адыгеим, Къэрэщэе-Черкесым, Къэ­бэртэе-Бэлъкъарым, Ставрополь ыкIи Краснодар крайхэм ялIыкIохэр.
Iофтхьабзэм хэлэжьагъэх район адми­нистрацием ипащэу УдыкIэко Адам, районым инароднэ депутатхэм я Совет итхьаматэу ПчыхьалIыкъо Аюб, АР-м и Къэралыгъо Совет – Хасэм идепутатхэу Хьабэхъу Юрэрэ КIыкI Аслъанрэ, МЧА-м игъэцэкIэкIо комитет илIыкIоу ХъокIон Хьамед, ветеранхэм ыкIи нахьыжъхэм ясоветхэм япащэхэр, мы чIыпIэм щыпсэурэ цIыфхэр.
Шыгъачъэм кIэщакIо фэхъугъ Адыгеим физическэ культурэмкIэ ыкIи спортымкIэ и Комитет. Ащ ыгъэнэфэгъэ ахъщэ шIухьафтыныр сомэ мини 160-рэ хъущтыгъ.
Гъогууанэу къакIугъэм елъытыгъэу текIоныгъэр къыдахыгъ Дарья Бекановам (шэу зытесыгъэр Амазонка), Андрей Орловым (Къаракез), Цуекъо Рустам (Беркут). Апэрэ чIыпIэр къызфагъэшъошагъэхэм ахъщэ шIухьафтынхэр, кубокхэр, медальхэр ыкIи щытхъу тхылъхэр аратыжьыгъэх.