ФутболымкIэ Къыблэ ыкIи Темыр-Кавказ федеральнэ шъолъырхэм ячемпионхэм илигэ щешIэрэ Адыгеим икомандэу «Кавказ-Адэмыер» зэнэкъокъум ифиналныкъо ихьагъ.

Мы Iофтхьабзэм ипэублэ командэ 12-мэ заушэтынэу рагъэжьэгъагъэмэ, ахэм ащыщэу джырэ уахътэм къэнагъэр 4.
Къуаджэу Адэмые икомандэ Къалмыкъ Республикэр къэзыгъэлъэгъорэ «Тюльпаным» дешIагъ ыкIи текIоныгъэр къыдихыгъ. Мельникхэу Артемрэ Денисрэ къэлапчъэм ­Iэгоуищ дадзагъ, джащ фэдэу Псэунэ Тимуррэ Датхъужь Адамрэ пчъагъэм хагъэхъуагъ, 5:2-у зэIукIэгъур аухыгъ.
ШэкIогъум и 17-м «Кавказ-Адэмыер» Краснодар краим и Динской район къэзыгъэлъэгъорэ командэу «ПСК-м» дешIэщт. А зэIукIэгъум къыщынэфэщт финалым ихьащтыр.
Шъугу къэдгъэкIыжьын, мы зэнэкъокъум текIоныгъэр къыщыдэзыхырэм Урысые футбольнэ Союзым ишъолъырхэм я Кубок икъыдэхын фэгъэхьыгъэ зэнэкъокъум хэлэжьэн ылъэкIыщт.